जिलाक ४१३ संवेदनशील आ महत्वपूर्ण स्थानपर ८२६ मजिस्ट्रेट आ पुलिस अधिकारी तैनात कयल गेल छल।
*
मधुबनी समदिया
*
पूरा जिलामे मुहर्रम शान्तिपूर्ण आ सौहार्दपूर्ण वातावरणमे मनाओल गेल। जिला प्रशासन मुहर्रम महोत्सवक लेल पूर्ण रूपसँ तैयार छल। जिलाक ४१३ संवेदनशील आ महत्वपूर्ण स्थानपर ८२६ मजिस्ट्रेट आ पुलिस अधिकारी तैनात कयल गेल छल। तेज-तरार अधिकारीसभसँ बनल त्वरित प्रतिक्रिया दल कोनो स्थितिसँ निपटबाक लेल पूर्ण रूपसँ तैयार छल। विभिन्न सोशल मीडिया प्लेटफॉर्म पर बारीकीसँ नजरि राखल जा रहल छल।जिला मजिस्ट्रेट सोशल मीडिया पर भड़काउ आ भ्रामक पोस्ट करयवला लोकक पहिचान करबाक आ ओकर खिलाफ कार्यवाही करबाक निर्देश देने छलथि।
जिलाधिकारी अरविन्द कुमार वर्मा आ पुलिस अधीक्षक सुशील कुमार स्वयं एहि समयक गतिविधिक निगरानी कऽ रहल छलाह आओर कानून-व्यवस्थाक निगरानी कऽ रहल छलाह। काल्हि भोरेसँ वरिष्ठ अधिकारी मधुबनी शहर सहित जिलाक महत्वपूर्ण आ संवेदनशील स्थानक जायजा लऽ रहल छलथि। कानून आ व्यवस्थाक सम्बन्धमे विभिन्न स्थानपर प्रतिनियुक्त मजिस्ट्रेट आ पुलिस अधिकारीसभसँ भेंट कऽ प्रतिक्रिया सेहो लेल जा रहल छल। जिला नियंत्रण कक्षसँ पल-पलक गतिविधि पर नजरि राखल जा रहल छल। जिला नियंत्रण कक्षमे पर्याप्त संख्यामे मजिस्ट्रेट, पुलिस अधिकारी आ पुलिस बल उपस्थित छल। कोनो प्रकारक जानकारी वा सहायताक लेल जिला प्रशासन जिला नियंत्रण कक्षक टेलीफोन नम्बर ०६२७६-२२४४२५ निर्गत कयने छल।
