‘माई बहिन मान’ योजनाक घोषणाक पर राजद आ कांग्रेसक बीच विरोधाभास अछि। सोमकेँ कांग्रेसक वरिष्ठ नेता प्रेमचन्द मिश्रा कहलनि जे कोनो पैघ घोषणा करबासँ पहिने सहयोगी दलसँ चर्चा करबाक चाही। सहमति जरूर लेनाइ चाही। किएकि सबकेँ मिलिकेँ चुनाव लड़बाक अछि। पहिने चुनाव लड़बा पर ध्यान देबाक चाही। एहि बात पर ध्यान देबाक आवश्यकता अछि जे महागठबंधन कोना एकजुट भऽ चुनाव लड़लय आ जीतय। किएकि लड़ाई एनडीए केर संग अछि, जकर केंद्र आ बिहार दुनूमे सरकार अछि।
कांग्रेस नेता आगू कहलनि जे जखनि गठबंधन सरकार बनत तखनि सहयोगी दल मिलि कऽ तय करत जे कोन योजनामे कतेक पाइ देबाक अछि। कांग्रेस शासित राज्यमे ‘माई बहिन’ सन योजना चलि रहल अछि। लोकसभा चुनावक दौरान राहुल गांधी इहो वादा कयने छलाह जे जँ सरकार बनत तऽ सालाना साढ़े सात हजार रुपया महिलाक खातामे देल जाएत।
प्रेमचंद मिश्र कहलनि, “जँ बिहारमे महागठबंधनक सरकार बनैत अछि तऽ २ टा उप मुख्यमंत्रीक नियुक्ति होयबाक चाही। एकटा मुस्लिम समुदायसँ आ एकटा सामान्य वर्गसँ। एहि बेर लोकसभा चुनावक परिणामक स्ट्राइक रेटक आधार पर विधानसभा चुनावक लेल महागठबंधनक सीटक बँटवारा होयबाक चाही। ९ सीटमे सँ ३ सीट कांग्रेस जीतल अछि, पप्पू यादव निर्दलीयक रूपमे जीतलाह। ओ सेहो कांग्रेसक छथि, माने कांग्रेस ४टा सीट जितलक। राजद २२ सीट पर चुनाव लड़लक मुदा ४ पर जीत हासिल केलक। २०२० सँ हम बिहार विधानसभा चुनावमे ७० सीट पर चुनाव लड़लहुं। ओहिसँ कम पर लड़बाक कोनो प्रश्ने नहिं अछि।
दोसर दिसि राजद प्रवक्ता एजाज अहमद कांग्रेस नेताक बयान पर प्रतिक्रिया देलनि अछि। ओ कहलनि जे हुनका महागठबंधनक मंच पर बजबाक चाही। माई बहिनक सम्मानमे महागठबंधन सरकारक गठन भेला पर माई बहिन योजना शुरू होयत। महिलाकेँ हर महीना २५०० रुपया देल जाएत। जतय धरि सीट बंटवाराक फार्मूला कांग्रेस दऽ रहल अछि आ २ टा उप मुख्यमंत्री बनेबाक माँग कऽ रहल अछि। लालू आ तेजस्वी यादव एवं सोनिया गाँधी आपसमे चर्चा कय निर्णय पर पहुँचल जाएत।
भाजपाक राष्ट्रीय प्रवक्ता डॉ. अजय आलोक कांग्रेस-राजदक टकराव पर प्रतिक्रिया देलनि अछि। ओ कहलनि जे लालू राबड़ी अपन १५ सालक शासनकालमे बिहारमे माय-बहिनक संग एहेन काज कयने छलथि, की राजद कहियो हमर बहिनक सम्मान कय सकैत अछि ? पहिले, एहि लोकसभकेँ महिलाक सम्मान करब सीखबाक चाही। ओ कहलनि जे कांग्रेस कखनो सहयोगी दलकेँ सबक सिखाबैत अछि, कखनो सहयोगी दल कांग्रेसकेँ सबक सिखाबैत अछि।
ओतहि जखनि अजय आलोकसँ पूछल गेल जे अगिला साल विधानसभा चुनाव अछि। की मुख्यमंत्री नीतीश कुमार हर महीना महिला सभकेँ पाइ देबाक योजनाक घोषणा करताह ? एहि पर ओ कहलनि जे बिहारमे महिला सशक्तिकरण लेल कतेको योजना चलि रहल अछि। अईठाम बहुत काज भेल अछि।
तेजस्वी यादव घोषणा कयलनि अछि जे यदि २०२५क विधानसभा चुनावमे महागठबंधन सरकार बनैत अछि तँ ओ ‘माय बहिन मान’ योजना शुरू करताह। एकर तहत महिलाकेँ २५०० रुपया प्रति मास देल जाएत। तेजस्वीक घोषणासँ महागठबंधनमे हंगामा शुरू भऽ गेल बुझाइत अछि। उल्लेखनीय अछि जे महाराष्ट्रमे लाडली बहन योजनासँ एनडीए लाभान्वित भेल अछि आ महागठबंधनकेँ झारखण्डमे मईयां सम्मान योजनासँ लाभ भेटल अछि। आब तेजस्वी बिहार चुनाव पर दांव फेंकलनि अछि।
