“मैथिल समन्वय समिति अपन संस्थापक संयोजक दिवंगत धीरज चन्द्र झाक स्मृतिमे विगत् २०१७ ईस्वीसँ हुनकहिं नाम पर दशवीं एवम् बारहवीं कक्षामे नीक अंक प्राप्त केनिहार छात्र/छात्राकें समारोहपूर्वक सम्मानित करैत आबि रहल अछि। समितिक संरक्षक डाॅ. संदीप झा द्वारा लेल गेल निर्णयक फलस्वरूप सम्मान समारोहक प्रतीक्षा मुंबई प्रवासी मिथिलावासी करैत रहैत छथि। कोरोना महामारीक भयावह संक्रमणक समय सेहो समिति ऑनलाइन आयोजन करैत सम्मान समारोहक परम्पराकें बढ़बैत रहल।” ई उद्गार मैपुप्र मुंबई समदियाकेँ ‘मैथिल समन्वय समिति’क अध्यक्ष राजकुमार झा व्यक्ति कयलनि।
झा आगू जनतब देलनि, एहि वर्ष २० जुलाई, २०२५ कें ठाणे स्थित एनकेटी काॅलेजक सभागारमे आयोजन होमय जा रहल अछि। लगभग ३०० छात्र/छात्राकें सम्मान-पत्र, मोमेंटो तथा उपहार स्वरूप पारितोषिक दऽ सम्मानित कयल जायत। समारोहक मुख्य पाहुन बिहार सरकारमे पथ निर्माण मंत्री नितिन नवीन सिन्हा उपस्थित भऽ छात्र/छात्राकें मार्गदर्शन करताह। पूर्व समारोहक अनुरूप एहि अवसर पर सांस्कृतिक कार्यक्रमक प्रस्तुति मधुरंजन झा एवम् सुश्री यमुना शर्मा द्वारा कयल जायत। कार्यक्रमक उपरांत प्रीति भोजक व्यवस्था अछि।
