प्राचीन एवं पवित्र धर्ममूला (धेमुरा ) नदीक संरक्षण एवं पुनरुद्धारक निमित्त रवि दिन (16 मार्च ) केँ भोर 10 बजे राम घाट, गोरहो, बनगाँवमे धर्ममूला नदीक तट पर ‘धर्ममूला नदी संरक्षण अभियान’क आयोजन बनगाँव वासी सभक द्वारा कएल गेल। अभियानक शुभारम्भ पं. हरिश्चन्द्र मिश्र जी द्वारा धर्ममूला नदीक प्राचीनता, महत्ता एवं आध्यात्मिकता पर देल गेल रोचक एवं ज्ञानवर्धक वक्तव्यसँ भेल।
एहि अवसर पर प्रो. कल्पना कुमारी कर्ण द्वारा धर्ममूला नदीक विधिवत पूजा अर्चना कएल गेल। पं. हरिश्चन्द्र मिश्र जीक अध्यक्षतामे आयोजित एहि जन जागरूकताक कार्यक्रममे स्थानीय निवासी सभक एकटा महत्वपूर्ण बैसारक आयोजन भेल। एहि बैसारमे धर्ममूला नदीक वर्तमान संकटग्रस्त स्थिति तथा एहिसँ उबरय केर उपाय आदि पर बहुपक्षीय विमर्श भेल, जाहिमे भारी संख्यामे स्थानीय लोक एवं मिडिया प्रतिनिधिक सहभागिता रहलै।
एहि अवसर पर प्रमुख वक्ताक रूप मे डॉ. विनय कर्णक संग-संग प्रमुख समाजसेवी शशिधर ठाकुर, पूर्व प्रधानाचार्य विश्वनाथ खाँ, शिक्षाविद डॉ. गणेश जनगण, वार्ड पार्षद रूपा देवी, मिथिला पेंटिंग कलाकार अमृता शाम्भवी, समाज सेवक विशेश्वर मुखिया, कलाकार मुखिया, विनोद मुखिया, दिलखुश मुखिया आदिक अतिरिक्त धनञ्जय खाँ ‘धरम’ एवं सामाजिक संस्था उग्राद्याक प्रतिनिधि सुमित सौरभ अपन-अपन विचार रखलनि।
एहि अवसर पर अनेक गणमान्य महानुभाव सभक गरिमापूर्ण उपस्थितिमे अभियानक सुचारु संचालन एवं भावी कार्य योजनाक क्रियान्वयन हेतु कार्य समितिक गठन सर्वसम्मतिसँ कएल गेल।
शशिधर ठाकुर एहि समितिक अध्यक्ष, रूपा देवी उपाध्यक्ष, डॉ. विनय कर्ण संयोजक/सचिवक रूपमे मनोनीत भेलैथि।
‘धर्ममूला नदी संरक्षण अभियान’क संयोजन उग्राद्या (एन. जी. ओ. ) केर सौजन्यसँ डॉ. विनय कर्ण द्वारा कएल गेल। अंतमे धर्ममूला नदीक संरक्षण एवं पुनरुद्धारक लेल स्थानीय जन सहयोग एवं सहरसा जिला प्रशासन तथा बिहार सरकारसँ सहयोगक आह्वान कएल गेल।
