तेजस्वी यादवक एक्स पोस्ट पर विजय सिन्हा कहलनि जे हुनका जातीय गणनासँ नहि, जातीय उन्मादसँ मतलब अछि। ओ विकासक पक्षधर नहि, विकास विरोधी मानसिकताक छथि। ओ तेजस्वीकेँ नौटंकीबाज कहलनि आ कहलनि जे ओ नेता नहि, अभिनेता छथि। आगू ओ कहला जे तेजस्वी जकाँ चारु तरफ नौटंकी करयवला नेता मनोरंजनक लेल होइत अछि। बिहार विकासक सम्मानक प्रतीक नहि।
डिप्टी सीएम कहला कि 94 लाख परिवारक आय छह हजारसँ नीचा अछि। 63 प्रतिशत आबादीक आय 10,000 सँ कम अछि। एहि पर तेजस्वीक मुँह नहि खुजल अछि ? ओ मात्र जातिक बात करैत छथि। केन्द्र सरकारक जातीय गणना कराबैक निर्णयकेँ बिहार चुनावसँ जोड़ि कय नहि देखल जाए। ई देश भरिमे होएत। देशमे एखनि लोकसभा चुनाव नहि भ’ रहल अछि।
वास्तवमे तेजस्वी यादव अपन एक्स पोस्टमे लिखलनि अछि जे जातिगत जनगणना तँ एकटा शुरुआत अछि, पिक्चर एखनि बाक़ी अछि। पिछड़ाक/अति पिछड़ाक लेल आरक्षित निर्वाचन क्षेत्र, निजी क्षेत्रमे आरक्षण, ठेकेदारीमे आरक्षण, न्यायपालिकामे आरक्षण, मंडल कमीशनक बाँचल सिफारिशकेँ लागू करब, आबादीक अनुपातमे आरक्षण देब, बिहार खातिर विशेष राज्यक दर्जा, बिहार खातिर विशेष पैकेज। मुदा उच्च मानसिकताक समता विरोधी संकीर्ण आ नकारात्मक संघी/भाजपाई गारि देताह, लेकिन बादमे हमर एजेंडाकेँ अपन मास्टर स्ट्रोक कहताह। कतबा खोखला लोक छथि ई ?
पहलगाममे भेल आतंकवादी हमला पर पाकिस्तान पर ठोस कार्यवाही कखन हेतै ? विपक्षक सवाल पर विजय सिन्हा कहलिन कि इ लोक पकिस्तानीकेँ दामाद बना लेने अछि आ भारतमे बहु बना कऽ रखने अछि। एहि लोक पर कड़ा कार्यवाही कयल जायत। आब डाढ़ि नहिं काटल जाएत, जड़ि खोधल जा रहल अछि। एहि जड़िमे जे सभ जल डालैत छलथि, तिनका सभकेँ ताकल जा रहल अछि। सभकेँ नष्ट कयल जाएत।
