वक्फ संशोधन कानूनक खिलाफ रविकेँ इंडिया गठबंधनक नेता पटनाक गांधी मैदानमे एक जुट भेलथि। मुस्लिम संगठन सभक अपील पर विपक्षी नेता सभ वक्फ संशोधन कानूनक खिलाफ अपन आवाज उठेलनि।
कांग्रेसक वरिय नेता सलमान खुर्शीद, नेता प्रतिपक्ष तेजस्वी यादव आ पूर्णिया सांसद पप्पू यादवक संग कतेको दिग्गज नेता मंच पर पहुँचलथि आ राष्ट्रीय जनतांत्रिक सरकारक खिलाफ जोरदार हमला कएलनि।
नेता प्रतिपक्ष तेजस्वी यादव कहलनि कि उत्तरसँ दक्षिण हिन्दुस्तानक एक-एक इंच आ हर पन्ना चीत्कार करि कहि रहल अछि कि हिन्दू, मुसलमान संगही सब धर्मक लोक सभ मिलि स्वतंत्रता संग्राममे अपन योगदान देलनि। सभ कोई एहि देशक आजादीक लेल कुर्बानी देलक। ई देश ककरो बापक नहि अछि। ई हमर सभक देश अछि। मुदा, सभसँ महत्वपूर्ण बात ई अछि कि अपने सभक हक छीनल जा रहल अछि। आ अब भाजपा सत्तासँ जा रहल अछि। एहि लेल गरीब, दलित, पिछड़ा, अति पिछड़ा आ अल्पसंख्यक सभक हक छिनय चाहैत अछि।
नेता प्रतिपक्ष कहलनि कि प्रधानमंत्री नरेंद्र मोदी निर्वाचन आयोगकेँ बिहारक समस्त मतदाता सूचीकेँ निरस्त कय, मात्र 25 दिनमे 1987 सँ पूर्वक कागजी प्रमाण संग एकटा नया मतदाता सूची बनाबय केर निर्देश देलनि अछि। चुनावी हारिक बौखलाहटमे ई लोक आब बिहार आ बिहारी सभसँ मतदानक अधिकार छिनय केर साजिश कऽ रहल अछि। विशेष गहन पुनरीक्षणक नाम पर ई अहाँक वोट काटि देत, ताकि मतदाता पहिचान पत्र नहि बनि सकय। फेर ई अहाँक राशन, पेंशन, आरक्षण, छात्रवृत्ति सहित अन्य योजनासभसँ वंचित कय देताह। तें अहाँसभसँ विनती अछि कि अहाँ सचेत रही। एनडीए सरकारक लोक कहीं अहाँक नाम वोटर लिस्टसँ काटि नहि देथि। ककरो अहाँ अपन अधिकार छिनय नहि देब।
