पटनामे व्यापारी गोपाल खेमका हत्याक मामिलामे डिप्टी सीएम विजय सिन्हा कहलनि जे दोषीक पहिचान भऽ गेल अछि। ओ कहलनि जे 2018 सँ 2025 केर बीच कार्यवाही किएक नहि भेल एहि पर सेहो जांच कयल जाएत आ जमीन माफियाक खिलाफ सेहो कारवाई कयल जाएत। एहि ठाम पुलिस एकटा संदिग्धकेँ हिरासतमे लेलक अछि।
शुक्रक राति व्यापारी गोपाल खेमकाकेँ घरक बाहर हत्या कऽ देल गेल। घात लगा एकटा व्यक्ति हुनकर माथमे गोली मारि देलक। एहि कारणे ओ घायल भऽ गेलाह। तुरंत हुनका मेडिवर्सल अस्पताल पहुंचा देल गेल, मुदा डॉक्टर हुनका मृत घोषित कऽ देलक।
घटनाक बाद गोपालक परिवार थानामे फोन कयलक, मुदा कियो कोनो जवाब नहि देलक। घटनाक सूचना फोन पर एडीजी मुख्यालयकेँ देल गेल। एकर बाद बिहार पुलिस सक्रिय भऽ गेल। गांधी मैदान थाना घटना स्थलसँ महज 300 मीटर दूर अछि, मुदा पुलिसकेँ ओहि ठाम पहुंचबामे दू घंटा लागि गेल। ओना आब उपमुख्यमंत्री अकुशल अधिकारीक खिलाफ कार्यवाहीक बात कय देलनि अछि।
गोपाल खेमकाक बेटाकेँ सेहो एही तरहे हत्या कऽ देल गेल छल। सात साल पहिने हुनकर बेटाकेँ फैक्ट्रीक गेट पर किछु लोक गोली मारि हत्या कय देलक। आब एहि तरहेँ पिताक हत्या भ’ गेल अछि। बेटाक हत्याक बादो पुलिस कड़ा कार्यवाही नहि कयलक आ आब गोपाल खेमका सेहो मारल गेल। बताओल जा रहल अछि जे शूटरकेँ ठेका दऽ कऽ हत्या कराओल गेल अछि। हत्या कराबय वालाक सेहो पहिचान भऽ गेल अछि।
गोपाल खेमका पटनाक विभिन्न सामाजिक संस्थासँ जुड़ल छलाह आ रोटरीक वरिष्ठ सदस्य छलाह। गोपाल खेमका पटनाक सुप्रसिद्ध उद्योगपति छलाह जिनकर हाजीपुरक स्वास्थ्य, पेट्रोल पंप आ कपासक फैक्ट्री सहित बहुत रास व्यवसायमे योगदान छल। ओ बांकीपुर क्लबक पूर्व सचिव छलाह। ओ मगध अस्पतालक मालिक सेहो छलाह।
