ट्रम्प बुधदिन घोषणा कयलनि जे हुनकर प्रशासन ग्रीनलैंडक लोकक अपन भविष्य निर्धारित करबाक अधिकारक “दृढ़तासँ समर्थन” करत। ओ कहलनि “जँ अहाँ चाहैत छी तँ हम अहाँक अमेरिकामे स्वागत करैत छी”। डेनमार्कक प्रधानमन्त्री मेटे फ्रेडरिक्सन ट्रम्पक टिप्पणी पर डेनमार्कक स्थिति स्पष्ट कयलनि आ कहलनि जे ग्रीनलैंडक भविष्य मात्र ओकर लोक द्वारा निर्धारित कयल जायत। “ग्रीनलैंड ग्रीनलैंडक लोकक अछि। ई एकटा एहेन स्थिति अछि जकर हम डेनमार्क सरकार दिसिसँ बहुत दृढ़तासँ समर्थन करैत छी।”
ग्रीनलैंडक प्रधानमंत्री म्यूट एगेडे सेहो ट्रम्पक दावाकेँ पूर्ण रूपसँ खारिज कऽ देलनि। ओ सोशल मीडिया पर लिखलनि जे ग्रीनलैंडक लोक अमेरिकाक हिस्सा बनबाक इच्छा नहि रखैत छथि। डेनमार्कक रक्षा मंत्री ट्रॉल्स लुंड पॉल्सन सेहो एकरा दोहराबैत कहलनि, “ग्रीनलैंड कहियो अमेरिकाक हिस्सा नहि होयत।”
दुनियाक सबसँ पैघ द्वीप ग्रीनलैंड १९५३ धरि डेनमार्कक उपनिवेश छल। ओकर बाद ई डेनमार्कक अभिन्न अंग बनि गेल आ ग्रीनलैंडक लोककेँ डेनमार्कक नागरिकता देल गेल। १९७९मे ग्रीनलैंड स्वशासन प्राप्त कयलक, मुदा डेनमार्क अपन विदेश आ रक्षा नीति पर नियंत्रण बरकरार रखलक।
ग्रीनलैंडक प्रधानमन्त्री एगेडे बुधदिन दोहरओलनि जे ग्रीनलैंडक लोक अपन भविष्य तय करत आ ओ डेनिश वा अमेरिकी नहि बनय चाहैत छथि। ओ सोशल मीडिया पर पोस्ट कयलनि “हम अमेरिकी नहि बनय चाहैत छी, हम डेनिश नहि बनय चाहैत छी, हम कलालिट (ग्रीनलैंडर्स) छी।”
अमेरिकी आ ओकर नेताकेँ इ बुझबाक जरूरत अछि।
