एयर इंडिया सोमदिन घोषणा कयलक कि ओ १ सितंबरसँ दिल्ली आ वाशिंगटन डीसी केर बीच सीधा उड़ानकेँ अस्थायी तौर पर रोकि रहल अछि। ई फैसला किछु परिचालन कारणसँ कयल गेल अछि ताकि एयर इंडिया अपन पूरा रूट नेटवर्कक विश्वसनीयताकेँ बरकरार राखि सकय।
एहि सेवाकेँ रोकबाक मुख्य कारण एयर इंडियाक बेड़ामे विमानक अस्थायी कमी अछि। एयर इंडिया पिछला महीना २६ बोइंग ७८७-८ विमानक रिफिटिंग (नव सजावट आ सुविधा) कार्यक्रम शुरू कयलक। एहि पैघ बदलावक उद्देश्य यात्रीकेँ बेहतर अनुभव देनाइ अछि। मुदा एकर कारण बहुत सारा विमान बहुत दिन धरि सेवासँ बाहर रहत। ई प्रक्रिया 2026 केर अंत धरि जारी रहत।
एकर अलावा पाकिस्तानक हवाई क्षेत्र बंद होबय केर कारण नमहर दूरीक उड़ानक मार्ग नमहर आ जटिल भऽ गेल अछि, जाहिसँ परिचालनमे आओर समस्या पैदा भऽ गेल अछि। जे यात्री 1 सितंबर 2025 केर बाद वाशिंगटन डीसीक लेल एयर इंडियासँ टिकट बुक कयने छथि हुनकासँ एयर इंडिया संपर्क करत। हुनका अन्य विकल्प देल जायत, जाहिमे अन्य फ्लाइट पर रिबुकिंग वा पूरा रिफंड शामिल अछि।
एयर इंडिया वाशिंगटन डीसी सीधा उड़ान बंद कय रहल अछि, मुदा यात्री एखनो एयर इंडिया केर चारि अमेरिकी गेटवे (न्यूयॉर्क, नेवार्क, शिकागो आ सैन फ्रांसिस्को) सँ एक स्टॉपक संग यात्रा कय सकैत छथि। एयर इंडिया केर एही रूट पर अलास्का एयरलाइंस, यूनाइटेड एयरलाइंस आ डेल्टा एयर लाइन्सक संग साझेदारी अछि, जाहिसँ यात्रीकेँ सीधा गंतव्य पर एकल टिकट आ चेक-इन बैगेज भेटैत अछि।
एयर इंडिया एखनो भारत आ उत्तरी अमेरिका केर छह शहरक बीच सीधा उड़ान जारी राखत, जाहिमे कनाडा केर टोरंटो आ वैंकूवर शामिल अछि। एयर इंडिया ग्रुपमे एयर इंडिया (पूर्ण सेवा अंतरराष्ट्रीय एयरलाइन) आ एयर इंडिया एक्सप्रेस (कम लागत वला क्षेत्रीय एयरलाइन) शामिल अछि। एकर शुरुआत 1932 मे जेआरडी टाटा द्वारा कयल गेल छल।
