हालमे संपन्न दिल्ली विधानसभा चुनावक बाद भाजपा आलाकमान आब नव मुख्यमंत्रीक नाम पर निर्णय लेबाक प्रतीक्षा कऽ रहल अछि। प्रधानमंत्री नरेन्द्र मोदीक अमेरिका यात्रासँ वापिस अयलाक बाद नव मुख्यमंत्रीक नामकेँ अन्तिम रूप देल जायत। सूत्रक अनुसार, पार्टी अध्यक्ष जे.पी. नड्डा स्पष्ट कयने छथि जे मुख्यमंत्री निर्वाचिते विधायकसभमे सँ होयत आ ई निर्णय विधायक दलक बैसारमे कयल जायत, जे पीएम मोदीक वापसीक बाद होयत।
सूत्र इहो संकेत देलक जे यमुनाक सफाई नव भाजपा सरकारक मुख्य एजेण्डामे शामिल अछि। पार्टी एहि दिशामे काज शुरू कऽ चुकल अछि आ नदीकेँ स्वच्छ बनयबाक अपन वादाकेँ पूरा करबाक लेल प्रतिबद्ध अछि। एकर अतिरिक्त, आयुष्मान भारत योजना दिल्लीमे लागू कयल जायत, जाहिसँ वंचित नागरिककेँ स्वास्थ्य सुरक्षा प्रदान कयल जायत। आम आदमी पार्टीक कार्यकालमे दिल्लीमे ई योजना लागू नहि कयल गेल छल।
नड्डा इहो संकेत देलनि जे मुख्यमंत्रीक शपथग्रहणक बाद पहिल कैबिनेट बैसारमे किछु महत्वपूर्ण नीतिगत निर्णय लेल जायत। एकटा आओर महत्वपूर्ण घोषणा ई अछि जे दिल्लीक नव भाजपा सरकारमे कोनो उपमुख्यमंत्री नहि होयत।
५ फरवरीकेँ भेल दिल्ली विधानसभा चुनावमे भाजपा ७० सीटमेसँ ४८ सीट जितलक, जखन कि आम आदमी पार्टीकेँ मात्र २२ सीट भेटल। चुनाव परिणाम ८ फरवरीकेँ घोषित भेल छल। दिल्ली विधानसभाक वर्तमान कार्यकाल २६ फरवरीकेँ समाप्त भऽ रहल अछि आ ओहिसँ पहिने नव सरकारकेँ कार्यभार सम्हारबाक अछि।
