बिहार भाजपाक प्रदेश विस्तारित कार्यसमितिक बैसार १८ जुलाईकेँ होएत। पटनामे होबयवला एहि बैसारमे केन्द्रीय रक्षा मंत्री राजनाथ सिंह सेहो सम्मलित हेताह।
लोकसभा चुनावमे विपक्षक बेहतर प्रदर्शनक बाद आब भारतीय जनता पार्टी (भाजपा) सतर्क भऽ गेल अछि। जाहि राज्यमे आम चुनावमे भारतीय जनता पार्टीक प्रदर्शन खराब छल, ओहि राज्यमे आब पार्टी एक्शन मोडमे देखल जा रहल अछि। एहेनमे बिहारमे सेहो नीक प्रदर्शन नहिं भेला पर भाजपा संगठनकेँ आगामी विधानसभा चुनावकेँ लऽ कऽ मजबूत करबाक तैयारीमे जुटि गेल अछि।
एहि कड़ीमे बिहार भाजपाक प्रदेश विस्तारित कार्यसमितिक बैठक १८ जुलाईकेँ होएत। पटनामे होबयवला एहि बैसारमे केन्द्रीय रक्षा मंत्री राजनाथ सिंह सेहो भाग लेताह। बैसारमे राजनाथ सिंह पार्टी नेता आ कार्यकर्ता सभक सङ्ग पछिला लोकसभा चुनावक समीक्षा आ आगामी विधानसभा चुनावक रणनीति पर चर्चा करताह।
एकर संगहि बूथ स्तर पर पार्टीकेँ मजबूत करबाक लेल पार्टी कार्यकर्ता आ पदाधिकारी पर जोर देल जायत।
प्रदेश विस्तारित कार्यसमितिक बैसारमे प्रदेश अध्यक्ष सम्राट चौधरी, उपमुख्यमंत्री विजय सिन्हा, कोर समितिक सदस्य सहित सभ वरिष्ठ नेता शामिल होयत। लोकसभा चुनाव २०२४मे एन.डी.ए.केँ पैघ नोकसान भेल। एहि बेर एनडीए ३० सीट जितलक, जखन कि २०१९क आम चुनावमे एनडीए ३९ सीट जितल छल। २०१४क लोकसभा चुनावमे भाजपा राज्यक ४० सीटमेसँ १२ सीट जितल छल, जखन कि एनडीएकेँ ३० सीट भेटल छल।
ओतहि २०१९ केर तुलनामे भाजपा पाँच सीट हारि गेल आ एनडीए ९ सीट हारि गेल। एहेनमे आगामी विधानसभा चुनावमे भाजपाक की रणनीति होएत ? बिहार भाजपाक कार्यसमितिक बैठकमे एहि सब मुद्दा पर चर्चा होएत। बिहारमे २०२५क प्रारम्भमे विधानसभा चुनाव हेबाक अछि।
