मृतक मंसूर आलम दरभंगाक सिंहवाड़ा थाना क्षेत्रक प्राथमिक विद्यालय रसूलपुरमे 15 सालसँ शिक्षक छलथि। ओ मूल रूपसँ मधुबनीक बेनीपट्टी थाना क्षेत्रक तीसी परसौनी गामक रहय वला छलाह।
बिहारक दरभंगामे बुध दिन (28 मई, 2025) केँ भोर स्कूल जा रहल शिक्षककेँ गोली मारि हत्या कय देल गेल। मृतकक पहिचान मंसूर आलमक रूपमे कयल गेल अछि। ओ साइकिलसँ स्कूल जा रहल छलाह।
बताओल गेल अछि जे मंसूर आलम अपन परिवार संग स्कूलसँ दू किलोमीटर दूर शंकरपुरमे किराया पर घर लऽ कऽ रहैत छलाह। सभ दिनक भांति बुधदिन भोर सेहो ओ साइकिलसँ स्कूल जा रहल छलाह। एहि बीच बाइक सवार बदमाश सभ सिंहवाड़ा थाना क्षेत्रक भरवाड़ा-कमतौल पथ पर हुनका गोली मारि देलक। दूटा गोली हुनका लागल जाहिसँ तत्काल हुनकर मृत्यु भऽ गेल। एहि घटनासँ इलाकामे सनसनी पसरि गेल अछि। शिक्षकक शव सड़कक कात पड़ल छल। घटनाक बाद शिक्षकक पत्नी आ अन्य परिजनक कानैत-कानैत बुरा हाल छल।
घटनाक बाद मौका पर पुलिस पहुँचल। एफएसएलक टीम सेहो बजायल गेल। एसडीपीओ सदर-2 ज्योति कुमारी कहलनि जे शिक्षककेँ दू गोली मारल गेल अछि। भोर करीब 6 बजे केर आसपासक घटना अछि।
ओतहि बिहारमे बढ़ैत अपराध पर सांसद पप्पू यादव सरकार पर हमला कएलनि अछि। बुधदिन भोर ओ एक्स पर पोस्ट कऽ लिखलाह, “बिहारकेँ बीहड़ बना देल गेल अछि। बोरिंग रोडसँ बक्सर धरि कहर मचि रहल अछि। प्रतिदिन अपराधी मृत्यु केर गोली बाँटि रहल अछि। हुक्मरान सभकेँ कोनो फर्क नहि पड़ि रहल अछि। एकटा एडिशनल डायरेक्टर जनरल अपराधीकेँ खदेड़ैत अछि। ओतहि बिहार पुलिस एकटा रसूखदार पुलिस एसोसिएशनक पदाधिकारीक बेटाकेँ बचाबैत अछि! महारावणराज!”
