पटना उच्च न्यायालयक न्यायाधीश सह दरभंगा न्यायमंडलक निरीक्षी जज संदीप कुमार बेनीपुर व्यवहार न्यायालयक नवनिर्मित 5 मंजिला भवनक लोकार्पण फीता काटि आ दीप प्रज्वलित कय कयलन्हि । एहि दौरान ओ उपस्थित न्यायाधीश , प्रशासनिक पदाधिकारी , अधिवक्ता आ आम लोक सभकेँ संबोधित करैत कहलनि जे आइ हमरा लेल बहुत खुशीक दिन अछि जे जाहि भवनक हमआधारशिला रखने छलौं , ओहिये भवनक लोकार्पण करबाक आइ अवसर भेटल अछि।
एहि दौरान ओ अधिवक्ता सभसँ अपील करैत कहलनि जे लंबित वाद सबहक निष्पादनमे अपन सहयोग दैत जाइयौ जाहिसँ आम लोक सभकेँ न्याय केर प्रति आस्था जागृत भऽ सकय। ओ आगा कहलनि जे एहि नव भवनसँ न्यायिक पदाधिकारी आ अधिवक्ता सबहक संग-संग आम लोक सभकें बहुत सुविधा भेटतै । एहि केर देखैत एकर रखरखाव आ साफ सफाई केर पूरा ख्याल राखबाक अपील स्थानीय न्यायाधीश, पदाधिकारी, कर्मी आ अधिवक्ता सभसँ कयलन्हि।
एहि अवसर पर पटना उच्च न्यायालयक न्यायाधीश चंद्रशेखर झा मातृभाषा सह क्षेत्रिय भाषा मैथिलीमे अपन उद्बोधन करैत कहलन्हि जे मैथिली फ्रेंचक बाद दोसर सभसँ प्रसिद्ध भाषा अछि। एहिकेँ देखैत उच्चतम न्यायालय हालहिमे न्यायालयक पहिलुका निर्णय सभक मैथिलीमे अनुवाद कयल जयबाक निर्णय लेलन्हि अछि जे जल्दिये अधिवक्ता सहित पदाधिकारी सभकेँ उपलब्ध भऽ जायत जाहिसँ कार्य दक्षतामे बढ़ोतरी आ सुलभता हेतै। ओ एहि नवनिर्मित न्याय केर मंदिरकेँ स्वच्छ, सुंदर आ साफ राखबाक अपील करैत कहलनि जे स्वच्छतासँ कार्य दक्षतामे बढ़ोतरी होइत छैक , तें हमरा सबहक ई पुनीत कर्तव्य बनैत अछि जे एकरा साफ राखी। ओ शिलान्याससँ लऽ कय आइ उद्घाटन धरिक क्रियाकलापकेँ अपना आंखिक सोझामे संपन्न हेबाक लेल निर्माणसँ जुड़ल एजेंसी सभकेँ सेहो बधाई देलन्हि।
जिलाक प्रधान न्यायाधीश सह सत्र न्यायाधीश विनोद कुमार तिवारी आगत अतिथि सबहक स्वागत करैत बेनीपुर न्याय मंदिरक भव्य भवन हस्तगत हेबाक अवसर पर खुशी जाहिर कयलन्हि आ अपना समयमे निर्माण कार्य पूरा हेबा पर अत्यधिक प्रसन्नता व्यक्त कयलन्हि । कार्यक्रमकेँ संबोधित करयवलामे जिला पदाधिकारी कौशल किशोर, वरीय पुलिस अधीक्षक जगुनाथ रेड्डी जला रेड्डी, जिलाक तृतीय अपर सत्र न्यायाधीश सुमन कुमार दिवाकर सहित अनेको लोक शामिल छलाह।
बार एसोसिएशनक सचिव संजीव कुमार झा, संयुक्त सचिव उमेश चंद्र झा सहित न्यायिक पदाधिकारी आगत अतिथि सभकें चादर, पाग आ मेमोंटो दऽ कय सम्मानित कयलन्हि । कार्यक्रमक संचालन जिला विधिक सेवा प्राधिकारक सचिव आरती कुमारी कयलन्हि।
एहिसँ पूर्व उच्च न्यायालयक न्यायाधीश आ उपस्थित पदाधिकारी सभ जिला विधिक सेवा प्राधिकारक क्रियाकलापक न्यूज बुक केर लोकार्पण कयलन्हि।
