तटीय बंगालमे चक्रवात रेमल भेल कमजोर, तथापि हाई अलर्ट जारी

कोलकाता
*

पश्चिम बङ्गालक किछु क्षेत्रमे मध्यम प्रभावक बाद चक्रवात रेमल चक्रवाती तूफानमे कमजोर भऽ बदलि गेल। मौसम विभाग सोमदिन एकरा आओर कमजोर होयबाक भविष्यवाणी कयलक अछि।
मौसम विभाग द्वारा “भारी”सँ “बहुत भारी” बरखाक भविष्यवाणी कयलाक बाद प्रशासन हाई अलर्ट पर अछि।
रविदिन राति तुफानक दौरान उत्तरी कोलकातामे एकटा जर्जर भवनक देवाल ढहलासँ एकटा व्यक्तिक मृत्युक अतिरिक्त कोनो आन हताहतक सूचना नहिं भेटल अछि।

अधिकारीलोकनि कहलनि जे बवंडरक कारण राज्यक तटीय क्षेत्रमे कतेको गाछ उखड़ि गेल आ माटिक घर ढ़हि गेल। ओ कहलनि जे तटीय क्षेत्रसँ एक लाखसँ बेसी लोककेँ निकालल गेल अछि।
राज्यक राजधानी कोलकातामे गाछ उखड़ि गेल आ बिजलीक तार टूटि गेल। मुदा प्रशासनक तत्परताक कारण बिजली आपूर्ति वा इंटरनेट सेवा पर कोनो पैघ प्रभाव नहिं पड़ल। समाचार लिखबाक समय धरि कोलकाताक किछु सड़क पर पानि भरल छल।

सोमदिन भोरमे छिटपुट बरखा भेल, मुदा हवाक गति सामान्य छल। मुदा, राज्यक किछु तटीय क्षेत्रमे हवाक गति बहुत बेसी छल। बवंडरक कारण सियालदह आ कोलकाताक दक्षिणी डिवीजनमे लोकल ट्रेन सेवा प्रभावित भेल छल। रविदिन रातिसँ एकरा लगभग १० घंटा धरि रोकल गेल छल। सोमदिन भोर ९ बजेक बाद ई फेर शुरू भेल।
नेताजी सुभाष चन्द्र बोस अन्तर्राष्ट्रीय हवाई अड्डा पर रविदिन दुपहरिया १२.३० बजेसँ २१ घंटा धरि उड़ान परिचालन बाधित रहल। आब उड़ान फेर शुरू भए गेल अछि।
रेलवे अधिकारीसभ कहलनि जे कतेको ठाम पटरीपर गाछ खसलाक कारण सोमदिन भोरमे दक्षिण मण्डलमे लोकल ट्रेन सेवा स्थगित कऽ देल गेल छल।