देशमे कोरोनाक बढ़ैत मामिलासँ डर, सक्रिय मरीज 3758, केरलामे आंकड़ा 1400 पार

नई दिल्ली
*

बितल 24 घंटामे देशमे कोरोनाक सक्रिय मरीज सभक संख्यामे भारी उछाल देखल गेल अछि। वर्तमान समयमे देशमे 3758 कोरोना संक्रामित लोकक इलाज चलि रहल अछि। कोरोनासँ एखनि धरि 1818 लोक संक्रमणसँ मुक्ति भेल छथि, जखनि की दुटा कोरोना संक्रामित लोकक मृत्यु सेहो भऽ गेल अछि।

महाराष्ट्र-दिल्लीमे 400 सँ बेसी एक्टिव केस अछि। केरलामे कोरोनाक 64 नव मामिला सामने आएल अछि। एतय आब सक्रिय मरीजक आंकड़ा 1400 पहुँचि गेल अछि। एहि तरहें महाराष्ट्रमे 485, दिल्लीमे 436, गुजरातमे 320, पश्चिम बंगालमे 287, कर्नाटकमे 238, तमिलनाडुमे 199 आ उत्तर प्रदेशमे 149 कोरोना संक्रामित लोकनिक इलाज चलि रहल अछि। हालांकि, अधिकांश मरीज होम आइसोलेशनमे ठीक भऽ रहल छथि।

कोरोनासँ एखनि धरि दुटा कोरोना संक्रमितकेँ मृत्युक पुष्टि भेल अछि। मृत्युक मामिला केरला आ कर्नाटकामे दर्ज कयल गेल अछि। कर्नाटकामे 63 वर्षक पुरुष आ केरलमे 24 वर्षक महिलाक मृत्यु भेल। दुनू अन्य बीमारीसँ सेहो परेशान छलथि। केंद्र सरकारक कोविड डैश बोर्ड केर अनुसार, कोरोनाक बढ़ैत मामिलाक संग-साथ संक्रमणसँ मुक्त होबय वला मरीजक संख्या सेहो बढ़ि रहल अछि। एखनि धरि करीब एक तिहाई मरीज कोरोना पोजिटिव होबय केर बाद एहिसँ मुक्त भऽ चुकल अछि। फिलहाल सक्रिय मरीज सभक तुलनामे 1818 मरीज (32.45 प्रतिशत) कोरोना पोजिटिव होबय केर बाद स्वस्थ भऽ चुकल अछि।