उत्तर भारतक प्रमुख पाबनिमे सँ एक दीपावली आ छठिक तैयारी जोर-शोरसँ चलि रहल अछि। एहि अवधिमे लोकक अपन घर जयबाक कारण रेल मार्गक उपयोग बहुत बढ़ि जाइत अछि। एहि लेल रेलवे मंडल सेहो दीपावली आ छठि पर भीड़ पर काबू पाबय लेल विशेष तैयारी कऽ रहल अछि।
बिहारमे रेलवे मंडल प्रशासन दीपावली आ छठि पर संभावित भीड़ नियंत्रणक तैयारी कयलक अछि। रेलवे डिवीजनमे रेलवे लाइनक संग १०० सँ बेसी जगह पर छठि घाटक कारण अर्घक दिन रेलवे डिवीजनक सब रेलवे सेक्शन पर ३० किलोमीटरक गतिसँ ट्रेन चलायल जायत। एकरा लेल सब स्टेशन मास्टर, ट्रेन गार्ड आ ड्राइवरकेँ निर्देश जारी कयल गेल अछि। एकर संगहि रेलवे लाइनक संग जाहि खंड पर छठि घाट होएत, ओहि खंडमे ट्रेनक ड्राइवरक लगातार सीटी बजा कय ट्रेन चलाबय केर निर्देश देल गेल अछि।
डीआरएम विनय श्रीवास्तव जानकारी दैत कहलनि कि लगभग ७५ जोड़ी स्पेशल ट्रेन चलायल जायत। समस्तीपुर, दरभंगा, सहरसा जतय आरक्षणक लेल यात्रीक अधिक भीड़ होयबाक संभावना अछि, ओतय आवश्यकतानुसार अतिरिक्त पीआरएस टिकट काउंटर खोलल जायत। तीनटा अतिरिक्त काउंटर खोलबाक प्रस्ताव अछि, जकरा आवश्यकताक अनुसार आओर बढ़ाओल जा सकैत अछि।
रेलवे मंडलक रक्सौल, बापूधाम मोतिहारी, बेतिया, सीतामढ़ी, दरभंगा, समस्तीपुर, जयनगर, सहरसा, बनमनखी आ पूर्णिया कोर्ट स्टेशन पर अतिरिक्त बुकिंग काउंटर खोलल जा रहल अछि। समस्तीपुर, दरभंगा, सहरसा, जयनगर, सीतामढ़ी, बापूधाम, मोतिहारी, बेतिया, रक्सौल आ नरकटियागंजमे अतिरिक्त यूटीएस काउंटर खोलल जायत।
रेलवे डिवीजनक ११ स्टेशन पर विभिन्न विभागक अधिकारी नियुक्त कयल जायत, जे २४ घंटा धरि ओतय भीड़ नियंत्रण लेल नजरि राखत आ माॅनिटरिंग करत। पीआरएस काउंटरक चारूकात बुकिंग आ पूछताछ काउंटर लग विशेष ट्रेनक बैनर प्रदर्शित कयल गेल अछि, जतयसँ यात्री वैकल्पिक ट्रेनक बारेमे पूरा जानकारी प्राप्त कऽ सकैत छथि। मंडलक कंट्रोल रूममे एकटा वार रूम खोलल जायत। जतय सभ विभागक अधिकारी आ पर्यवेक्षक होयत जे प्रत्येक स्टेशन पर कयल जा रहल व्यवस्था पर नजर राखत आ आवश्यकतानुसार निर्देश देत।
डीआरएम कहलनि जे कोनो परिस्थितिमे अंतिम क्षणमे ट्रेनक निर्दिष्ट प्लेटफार्म नहि बदलल जायत। जँ कोनो आपातकालमे प्लेटफार्म बदलबाक आवश्यकता अछि तखनि एकरा एक घंटा पहिने वा पर्याप्त समयक भीतर बदलि देल जायत। घोषणा प्रणालीक माध्यमसँ यात्रीकेँ लगातार सूचित कयल जायत। एडीआरएमक अनुमोदनक बिना प्लेटफार्मक परिवर्तन नहिं कयल जाएत।
