घटनामे गंभीर रूपसँ घायल युवकक पहिचान रहिका थाना क्षेत्र अंतर्गत जगतपुर मारर गाम निवासी स्वर्गीय प्रेम चौधरीक पुत्र 23 वर्षीय राहुल कुमारक रूपमे कयल गेल अछि।
अपराधी राहुलकेँ मारि-पीट कs मरैत अवस्थामे खेतमे फेकि देलक आ फेर लगातार गोली चला देलक। मौकासँ गोलीक कतेको खोखा बरामद भेल अछि। गामक लोक जखनि ओहि युवककेँ खेतमे घायल देखलक तs रहिका थानाकेँ एहि घटनाक जानकारी देलक। पुलिस मौका पर पहुंचल आ परिवारक लोकक मददिसँ घायल युवकके मधुबनी सदर अस्पताल आनल गेल। ओतय प्राथमिक चिकित्साक बाद हालत गंभीर देखि राहुलके डीएमसीएच दरभंगा रेफर कs देल गेल।
एहि घटनाक बाद रहिका थाना क्षेत्रमे बढ़ैत अपराध आ पुलिस गतिविधि पर एक बेर फेर सवाल उठल अछि। स्थानीय लोकमे भय आ आक्रोशक माहौल अछि। हालक समयमे एहि क्षेत्रमे बहुत आपराधिक घटना घटित भs रहल अछि, जाहि चलते आम जनताक बीच असुरक्षाक भावना बढ़ि रहल अछि ।
घटनाक गंभीरताकेँ ध्यानमे रखैत रहिका थाना प्रमुख रविन्द्र कुमारक नेतृत्वमे लगपासक क्षेत्रमे छापामारी अभियान चलाओल जा रहल अछि। संगहि जिलाक अन्य थानाक पुलिस सेहो अपराधीक तलाशमे लागल अछि, पुलिस मौका परसँ गोली बरामद कs मामिलाक जांच तेज कs देलक अछि।
