मुजफ्फरपुरमे राजस्व खुफिया निदेशालय (डीआरआई)क टीम एकटा पैघ अभियानमे एक करोड़ टाकाक विदेशी सिगरेट जब्त कयलक अछि। ई सिगरेट दरभंगा-मुजफ्फरपुर फोर लेन पर मैठी टोल प्लाजा लग एकटा कंटेनरमे भेटल। सिगरेट दिल्ली लए जा रहल छल। डीआरआई कंटेनर चालककेँ गिरफ्तार कऽ मामलाक जाँच शुरू कऽ देलक अछि।
सूचनाक आधार पर डीआरआईक टीम मंगलदिन देर राति टोल प्लाजा लग कंटेनरकेँ रोकि लेलक। तलाशीक क्रममे कंटेनरमे एकटा तहखाना भेटल, जाहिमे विदेशी ब्रांडक सिगरेट नुकेने छल। ई सिगरेट अवैध रूपसँ दिल्ली लऽ जा रहल छल। गिरफ्तार ड्राइवरसँ पूछताछ कयल जा रहल अछि, आ डीआरआई एहि तस्करी नेटवर्ककेँ तोड़बाक लेल आगू जाँच कऽ रहल अछि। अधिकारी लोकनि ई पता लगयबाक प्रयास सेहो कऽ रहल छथि जे एहि विदेशी सिगरेटक आपूर्ति कतऽ-कतऽ होयबाक छल।
मुजफ्फरपुरमे विदेशी सिगरेटक तस्करीक ई छठम मामिला अछि। अधिकारीसभक मानब छनि जे एहि मार्गक उपयोग तस्करीक लेल व्यापक रूपसँ कयल जा रहल अछि। डीआरआई ई पता लगाबय केर कोशिश कऽ रहल अछि जे सिगरेट कतयसँ खरीदल गेल छल आ ओकर पाछू कोन गिरोह सक्रिय अछि।
