नगर निगम क्षेत्रक वार्ड संख्या ३५, ३६, ३७, ३८ आ ३९ मे ५.५० करोड़ टाकाक लागतक दूटा सड़क आ नालाक निर्माण कार्य सोमदिनसँ शुरू भेल।
सोमदिन महापौर विभा कुमारीक प्रतिनिधि समाजसेवी जितेन्द्र यादवक उपस्थितिमे निर्माण कार्यक उद्घाटन कयल गेल। महापौर प्रतिनिधि समाजसेवी जितेन्द्र यादव बतौलनि जे वार्ड नम्बर ३५, ३६ आ ३९ मे रमेश माँझी चौक सs शास्त्री नगर होइत हंसदा चौक धरि सड़क आ नाला निर्माण कार्य आ वार्ड नम्बर ३७ आ ३८ शनि मन्दिर सरदार टोलासँ एनएच ३१ धरि सड़क आ नाला निर्माणक काज शुरू कयल गेल अछि। एहि दूनू सड़क आ नालाक अनुमानित राशि ५.५० करोड़ अछि।
श्री यादव निर्माण कार्यमे शामिल एजेंसीसँ कहलखिन जे सड़क निर्माण कार्य मानकक अनुसार हेबाक चाही। निर्माण कार्यमे कोनो लापरवाही स्वीकार नहिं कएल जाएत। ओ स्थानीय लोकसभसँ निर्माण कार्यमे गुणवत्ताक ध्यान रखबाक लेल सेहो कहलनि। मुख्य रूपसँ वार्ड पार्षद प्रतिनिधि अजय माँझी, बहादुर यादव, चन्द्रशेखर पासवान, गिरधारी आर्य, किरण पासवान, मुन्ना चौधरी, मुरारी झा, गौरव जायसवाल, अरविन्द जायसवाल, इन्दर चौधरी, शालू मोदी, मोहम्मद अशफाक, जेई फयाज आदि उपस्थित छलाह।
