जम्मू-कश्मीर चुनावमे अफजल गुरु पर उमर अब्दुल्लाक बयान राजनीति गर्म कऽ देलक अछि। भाजपा नेता रविशंकर प्रसाद अब्दुल्लाक आलोचना कयलनि। जम्मू-कश्मीरमे चुनाव होबय जा रहल अछि। पूरा देश मे जम्मू-कश्मीरक राजनीतिक बारेमे चर्चा चलि रहल अछि। ओतहि उमर अब्दुल्लाक अफजल गुरुक विषयमे देल गेल बयानसँ मानू भूकंप आयल अछि। भाजपा नेता आ पूर्व केन्द्रीय मंत्री रविशंकर प्रसाद रविदिन तीक्षण प्रतिक्रिया देलनि अछि।
ओ कहलनि, “अफजल गुरु के छल ? की ओ पैघ आतंकी गतिविधिमे शामिल छल वा नहिं ? निर्दोष लोक मारल गेल छल कि नहिं ? आइ एकर राजनीतिकरण कएल जा रहल अछि। उमर अब्दुल्ला, फारूक अब्दुल्ला करय, मुदा कांग्रेस पार्टी चुप किएक अछि ? ई कांग्रेस पार्टीक चाल, चरित्र आ चेहरा अछि।”
रविशंकर प्रसाद कहलनि जे हम कांग्रेसकेँ बताबय चाहब जे कश्मीर आब बदलि गेल अछि। आब लाल चौक पर तिरंगा फहराओल जाइत अछि, भारत माता की जयक नारा लागैत अछि। ग्राम पंचायतक चुनाव भेल अछि, विस्थापित लोककेँ नागरिकता भेटल अछि, विकास भऽ रहल अछि, लाखो पर्यटक आबि रहल छथि। ओतएकेँ जनता कांग्रेस केर जवाब देत। भारतक प्रत्येक व्यक्ति कश्मीरसँ प्रेम करैत अछि। भारतक प्रत्येक व्यक्ति कश्मीरियतसँ प्रेम करैत अछि।
पुर्व केंद्रीय मंत्री कहलनि, “ई मात्र शेख अब्दुल्ला, फारूक अब्दुल्ला वा उमर अब्दुल्लाक कश्मीर नहिं अछि, ई पहाड़ी मुसलमानक कश्मीर सेहो अछि, ई गुज्जर आ बकरवालाक कश्मीर सेहो अछि।”
जनतब जे जम्मू-कश्मीरक पूर्व मुख्यमंत्री आ नेशनल कॉन्फ्रेंसक नेता उमर अब्दुल्ला संसद हमलामे दोषी अफजल गुरू केर बारेमे बड़का बयान देलनि । ओ कहलनि, “जँ अफजल गुरूक फांसीक लेल हमर सरकारसँ अनुमतिक जरूरत पड़ैत तऽ हम कहियो नहिं दैतौंह।”
