कांग्रेस बिहारक छओ लोकसभा सीटक लेल अपन उम्मीदवारक पहिल सूची जारी कऽ देलक अछि। रविदिन दिल्लीमे कांग्रेसक केन्द्रीय चुनाव समितिक बैसारमे कांग्रेस बिहारक शेष सीट पर बहुत विचार-विमर्शक बाद उम्मीदवारक नाम तय कयने छल। लेकिन, पेंच महाराजगंज सीट पर फँसल छल। बहुत विचार-विमर्शक बाद आलाकमान प्रदेश अध्यक्ष अखिलेश प्रसाद सिंहक बेटा आकाश सिंहकेँ टिकट देलक। अखिलेश सिंहक बेटा आकाश महाराजगंज सीटसँ चुनाव लड़ताह। सूत्रक अनुसार, बिहार प्रदेश कांग्रेसक कतेको नेताक विरोधक बीच अखिलेश प्रसाद सिंह कांग्रेस महासचिव (संगठन) केसी वेणुगोपालक सहयोगसँ कांग्रेस अध्यक्ष मल्लिकार्जुन खड़गेकेँ अपन बेटाक उम्मीदवारी पर मनयबामे सफल रहलाह।
ओना महाराजगंज सीट पर एमएलसी सचिदानंद राय अपन पत्नीकेँ टिकट दिआबय केर कोशिश कऽ रहल छलाह। मुदा, पार्टी आलाकमान आकाश सिंहक नामकेँ मंजूरी देलक।
आकाश पछिला बेर उपेन्द्र कुशवाहाक पार्टीक टिकट पर चुनाव लड़ने छलाह। लेकिन, हुनका हारक सामना करए पड़ल। मीरा कुमारक पुत्र अंशुल अविजितकेँ पटना साहिब लोकसभा क्षेत्रसँ टिकट देल गेल अछि। आर जे उम्मीदवार मनोनीत भेल छथि ओ छथि बेतियासँ मदन मोहन तिवारी, समस्तीपुरसँ बिहार सरकारक मंत्री महेश्वर हजारीक पुत्र सन्नी हजारी, सासारामसँ विश्वनाथ राम आ मुजफ्फरपुरसँ अजय निषाद। अजय निषाद टिकटक कारणे भाजपा छोड़ि कांग्रेसमे शामिल भेल छलथि।
कांग्रेस बिहारमे नौ सीट पर चुनाव लड़ि रहल अछि। भागलपुरसँ अजित शर्मा, कटिहारसँ तारिक अनवर आ किशनगंजसँ मोहम्मद जावेदक नामक घोषणा कांग्रेस पहिने कऽ चुकल अछि। तीनू नेता अपन-अपन क्षेत्रमे प्रचार सेहो शुरू कऽ देने छथि। शेष छओ सीट फर लोकक नजरि छल, से आब स्पष्ट भऽ गेल अछि।
