प्रवर्तन निदेशालय (ईडी) द्वारा नेशनल हेराल्डक मुद्दा पर अखिल भारतीय कांग्रेस कमिटी केर पूर्व अध्यक्ष सोनिया गांधी आ लोकसभामे नेता प्रतिपक्ष राहुल गांधीक खिलाफ चार्जशीट दाखिल कएल जयबाक विरोधमे बिहार कांग्रेसक नेता आ कार्यकर्ता सभ बुधदिन पटनामे ईडी दफ्तरक बाहर जोरदार विरोध प्रदर्शन कयलनि। कांग्रेसक कार्यकर्ता सभ ईडी दफ्तरक बाहर लागल बोर्ड पर स्प्रेसँ कारिख पोतलनि आ केंद्र सरकारक विरोधमे जोरदार नारा लगैलनि।
बिहार कांग्रेसक प्रदेश अध्यक्ष राजेश राम आ बिहार कांग्रेसक प्रभारी कृष्णा अल्लावरु संग सैकड़ों संख्यामे कार्यकर्ता मार्च करैत पटना स्थित ईडी दफ्तर पहुँचल। प्रदर्शनकारी सभ कहलनि, “जाहि तरिकासँ ईडी भाजपाक एजेंसी बनिकऽ काज करि रहल अछि, जाहि तरिकासँ ईडी द्वारा दुर्भावनाक कारवाई कयल जा रहल अछि, ओ गलत अछि। ईडीकेँ एकर कर्तव्यबोध हेबाक चाही जे ओ एकटा संवैधानिक संस्था अछि आ संवैधानिक संस्था कोनो दल विशेषक लेल काज नहि करैत अछि। ईडी तमाम राजनीतिक दल, जे भाजपाक विरोधमे अछि, हुनकर नेता सभक विरुद्ध जे कारवाई कऽ रहल अछि, से हमरा सभकेँ आक्रोशित करैत अछि। हम सभ पाछू नहि हटब।
नेशनल हेराल्ड मामिलामे ईडी केर चार्जशीट दाखिल करबाक कारण कांग्रेस द्वारा प्रदर्शन कएल जाएबाक पर बिहार प्रभारी कृष्णा अल्लावरु कहलनि जे प्रधानमंत्री नरेंद्र मोदी आ केंद्रीय गृह मंत्री अमित शाह जनताक लेल काज नहि करैत छथि, जखनकि दोसर पक्ष, ईडी, सीबीआई, इनकम टैक्स, प्रशासन, पुलिस हुनकर इशारा पर काज करैत अछि। जखनि अन्याय होइछ तऽ ओहि पर सड़क पर उतरय पड़ैत अछि। अन्याय केर खिलाफ कांग्रेस पार्टी सड़क पर उतरि रहल अछि।
उल्लेखनीय अछि जे नेशनल हेराल्ड मामिलामे गांधी परिवारक मुश्किल सभ बढ़ैत जा रहल अछि। प्रवर्तन निदेशालय (ईडी) केर टीम एहि मामिलामे लोकसभामे नेता प्रतिपक्ष राहुल गांधी, राज्यसभा सांसद सोनिया गांधी आ ओवरसीज कांग्रेस केर अध्यक्ष सैम पित्रोदाकेँ विरुद्ध आरोपपत्र दाखिल कएलक अछि।
