उत्तर प्रदेशक मुख्यमंत्री योगी आदित्यनाथ मंगल दिन कांग्रेसक महासचिव प्रियंका गांधी वाड्रा पर कटाक्ष कयलनि जे विधानसभाक शीतकालीन सत्रक दौरान संसदमे फिलिस्तीनी हैंडबैग लऽ कऽ आयल छलीह। सीएम योगी कहलनि कि कांग्रेस नेता फिलिस्तीनक बैग लऽ कऽ घूमि रहल छथि, जखन कि हम यूपीक युवाकेँ इजरायल भेजि रहल छी।
सीएम योगी विधानसभामे प्रियंका गांधीक नाम लेने बिना कटाक्ष करैत कहलनि कि कांग्रेसक एकटा नेता फिलिस्तीनक बैग लऽ कऽ संसदमे घूम रहल छलथि, जखन कि हम यूपीक युवाकेँ इजरायल भेजि रहल छी, एखन तक यूपी केर ५,६०० सँ बेसी युवा निर्माण कार्यक लेल इजरायल जा चुकल छथि। जतय हुनका सबकेँ मुफ्तमे रहन-सहन आ भोजन एवं डेढ़ लाख प्रति माह वेतन भेटि रहल अछि। संगहि पूर्ण सुरक्षाक सेहो गारंटी अछि। इजरायली राजदूत एखने आयल छलथि। ओ कहलनि जे हम उत्तर प्रदेशक आर बेसी युवाकेँ इजरायल लऽ जायब, किएक तँ यूपीक युवा बहुत नीक काज कऽ रहल छथि। हुनक कौशलक शक्तिकेँ आइ पूरा दुनिया चिन्हि रहल अछि।
वायनाडसँ कांग्रेस सांसद प्रियंका गाँधी वाड्रा जाड़क समयमे एकटा झोरा लऽ कऽ संसद पहुँचल छलीह जाहिपर ‘फिलिस्तीन’ लिखल छल। झोरामे एकटा उज्जर कबूतर आ तरबूज सेहो छल जे शान्तिक प्रतीक छल। एहि झोराक माध्यमसँ प्रियंका गाँधी सीधा संदेश देलनि अछि जे ओ फिलिस्तीनक समर्थनमे ठाढ़ छथि। मुदा, ई पहिल बेर नहि अछि जखन प्रियंका गाँधी वाड्रा फिलिस्तीनक समर्थन कयलनि अछि। एहिसँ पहिने ओ कतेको बेर फिलिस्तीनक पक्षमे आवाज उठा चुकल छथि। एतबे नहि, प्रियंका गाँधी वाड्रा भारत सरकारसँ फिलिस्तीन सङ्ग ठाढ़ होयबाक वकालत सेहो कयलनि।
योगी सरकार मंगलदिन विधानसभामे वित्तीय वर्ष २०२४-२५ लेल अपन दोसर अनुपूरक बजट प्रस्तुत कयलक। १७,८६५.७२ करोड़ टाकाक एहि अनुपूरक बजटमे ७९०.४९ करोड़ टाकाक नव प्रस्ताव शामिल कयल गेल अछि। ई एहि वित्तीय वर्षक दोसर अनुपूरक बजट अछि, जे मूल बजटक २.४२ प्रतिशत (७,३६,४३७.७१ करोड़ रुपैया) अछि।
एहिसँ पहिने योगी सरकार १२,२०९.९३ करोड़ टाकाक अनुपूरक बजट प्रस्तुत कयने छल। दुनू अनुपूरक बजटकेँ मिला कऽ योगी सरकारक वित्तीय वर्ष २०२४-२५ केर कुल बजट आब ७ लाख ६६ हजार ५१३•३६ करोड़क भऽ गेल अछि।
