कांग्रेसक कहब अछि जे इंडिया गठबंधनक दल अपन लोकतांत्रिक अधिकारक प्रयोग कयलक आ लोकसभा अध्यक्षक रूपमे कोडिकुन्निल सुरेशक समर्थनमे प्रस्ताव रखलक। एकर बाद इंडिया गठबन्धनक दल मतक विभाजनक लेल दबाव बना सकैत छल।
कांग्रेसक अनुसार, इंडिया गठबन्धन ई नहिं कयलक। एकर कारण ई अछि जे ओ सभ सर्वसम्मति आ सहयोगक एकटा मजबूत भावना चाहैत छलाह, जाहिमे प्रधानमंत्री आ राजगक काजमे स्पष्ट रूपसँ कमी अछि। ओतहि कांग्रेस सांसद राहुल गांधी बुधदिन लोकसभामे प्रतिपक्षक नेताक भूमिकामे उपस्थित भेलाह।
राहुल गाँधी आशा व्यक्त कयलनि जे संसदमे विपक्षक आवाजकेँ प्रतिनिधित्व करबाक अनुमति देल जायत। ओ अध्यक्षकेँ सदनकेँ नीक जकाँ चलयबामे पूर्ण सहयोगक आश्वासन देलनि।
नवनिर्वाचित अध्यक्ष ओम बिड़लाकेँ बधाई देबाक लेल अपन स्वागत भाषणमे राहुल गाँधी कहलनि जे निश्चित रूपसँ सरकार लग राजनीतिक शक्ति अछि, मुदा विपक्ष सेहो भारतक जनताक आवाजक प्रतिनिधित्व करैत अछि। विपक्ष पछिला बेरक तुलनामे बहुत बेसी लोकक प्रतिनिधित्व करैत अछि। ई सोचब जे विपक्षक आवाजकेँ दबा कऽ सदनकेँ कुशलतापूर्वक चलायल जा सकैत अछि, एकटा अलोकतांत्रिक विचार अछि। एहि चुनावसँ पता चलल अछि जे भारतक जनता विपक्षसँ देशक संविधानक रक्षा करबाक अपेक्षा करैत अछि।
ओ कहलनि, “प्रश्न ई नहिं अछि जे सदन कतेक कुशलतासँ चलैत अछि, ई अछि जे एहि सदनमे भारतक कतेक आवाज सुनबाक अनुमति देल जा रहल अछि। विपक्षकेँ बजबाक अनुमति दऽ, हमरासभकेँ अनुमति दऽ कऽ भारतक जनताक प्रतिनिधित्व करबाक अनुमति दऽ कऽ अहाँ भारतक संविधानक रक्षा करबाक अपन कर्तव्य पूरा करब।
सदन चलयबामे विपक्षक समर्थन आ सहयोगक आश्वासन दैत ओ अध्यक्षसँ कहलनि जे विपक्ष अहाँक काज करबामे अहाँक सहायता करय चाहत। हम चाहब जे सदन नियमित आ सुचारू रूपसँ चलय। संगहि ई बहुत महत्वपूर्ण अछि जे सहयोग विश्वास पर आधारित होय। ई बहुत महत्वपूर्ण अछि जे एहि सदनमे विपक्षक आवाजकेँ प्रतिनिधित्व करबाक अनुमति देल जाय। हमरा विश्वास अछि जे अहां हमरा प्रतिनिधित्व करबाक अनुमति देब, हमरा बजबाक अनुमति देब।
