कांग्रेस शुक्रदिन प्रधानमंत्री नरेन्द्र मोदीक “गारंटी” विषय पर पलटवार करैत मुख्य विपक्षी दल पर अंगुरी उठाबयसँ पहिने प्रधानमंत्रीसँ कहलक जे “मोदी गारंटी” १४० करोड़ भारतीय नागरिकक संग क्रूर मजाक अछि।
पार्टी अध्यक्ष मल्लिकार्जुन खड़गे प्रधानमंत्रीपर “झूठ, छल आ कपट”क आरोप लगओलनि आ इहो दावा कयलनि जे भारतीय जनता पार्टी (भाजपा)क अर्थ विश्वासघात आ जुमला अछि।
चुनावी वादा पर खड़गेक बयानक बाद प्रधानमंत्री मोदी कांग्रेस पर तीक्षण हमला कयने छलथि। ओ कहलनि जे कांग्रेस पार्टीकेँ आब एहसास भऽ गेल अछि जे झूठा वादा केनाइ आसान अछि, मुदा ओकरा लागू करब कठिन आ असंभव अछि।
वास्तवमे कांग्रेस अध्यक्ष खड़गे बुधकेँ कर्नाटक मे अपने सरकारक आलोचना कयलनि। ओ मुफ्त बस योजना (शक्ति) केर समीक्षाक बात पर नाराजगी व्यक्त कयने छलाह।
खड़गे कहलखिन जे ओतबे वादा करु जतेक अहाँ पूरा कए सकी।
खड़गे एक्स पर पोस्ट कयलनि, “नरेन्द्र मोदी जी, झूठ, छल, कपट, लूट आ दुष्प्रचार, ई पाँच विशेषण अछि जे अहाँक सरकारक सबसँ नीक वर्णन करैत अछि। हंड्रेड डे प्लानक बारेमे अपन ढ़ोल पीटब एकटा सस्ता पीआर स्टंट छल।”
ओ दावा कयलनि जे बीजेपी (भाजपा)मे ‘बी’क अर्थ अछि विश्वासघात, जखन कि ‘जे’क अर्थ जुमला अछि।
ओ सवाल कयलनि, “हर साल दू करोड़ नौकरीक वादा कयल गेल छल, मुदा भारतक बेरोजगारी दर ४५ सालक उच्चतम स्तर पर किएक अछि ? जतय मुट्ठी भरि नौकरीक लेल खाली जगह अछि ओतय भगदड़ किएक देखल जाइत अछि ? सात सालमे ७० पेपर लीकक लेल के जिम्मेदार अछि ? सार्वजनिक क्षेत्रक उपक्रममे हिस्सेदारी बेचि कए ५ लाख सरकारी नौकरी के छीन लेलक ?”
ओ कहलनि, “घरक बचत ५० सालक निचला स्तर पर किएक आबि गेल आ आम थारीक दाममे पिछले सालहि ५२ प्रतिशतक वृद्धि किएक भेल ?
खड़गे दावा कयलथि, “रुपया सर्वकालिक निचला स्तर पर अछि, की ई आईसीयूमे अछि या मार्गदर्शक मंडलमे ? अहाँक सरकार पिछला १० साल मे १५० लाख करोड़ टाकासँ बेसी उधार लेलक अछि, यानी हर भारतीय पर १.५ लाख रुपयाक कर्ज अछि। कांग्रेस अध्यक्ष दावा कयलनि जे देशमे आर्थिक असमानता १०० सालक उच्चतम स्तरपर अछि।
खड़गे कहलनि, “विकसित भारतक की भेल ? जे किछु अहाँ बनयबाक दावा करैत छी ओ ताशक घर जकाँ खसि रहल अछि। शिवाजीक प्रतिमाक उद्घाटन अहाँ महाराष्ट्रमे कयलहुँ, दिल्ली हवाई अड्डाक छत, अयोध्यामे राम मन्दिरक छत खसि पड़ल आ अटल सेतुमे दरार आबि गेल।’’
ओ कहलनि जे अनगिनत रेल दुर्घटना भेल अछि, जखन कि “रील मंत्री” प्रचारमे व्यस्त छथि।
खड़गे कहलखिन, “ना खाऊंगा, ना खाने दुंगा केर की भेल ? हमरा लग अहाँक लेल मात्र दूटा शब्द अछि – मोदानी मेगा घोटाला आ सेबी अध्यक्ष। असंवैधानिक चुनावी बॉन्डक माध्यमसँ जबरन वसूली आ लूट भाजपाक सबसँ पैघ वित्तीय अपराध अछि।”
ओ कहलनि, ‘हम देश झुकए नहिं देब’ केर की भेल ?
ओ दावा कयलनि जे गलवान द्वारा चीनकेँ क्लीन चिट देलाक बाद चीनी निवेशक लेल लाल कालीन बिछाओल गेल आ प्रत्येक पड़ोसी देशक सङ्ग सम्बन्ध बिगड़ि गेल।
खड़गे पुछलखिन जे ‘सबका साथ, सबका विकास’ आ ‘जय किसान, जय जवान’ केर की भेल ?
ओ दावा कयलनि, “अनुसूचित जातिक विरुद्ध अपराधमे ४६ प्रतिशतक वृद्धि भेल अछि, जखन कि अनुसूचित जनजातिक विरुद्ध अपराधमे ४८ प्रतिशतक वृद्धि भेल अछि। २०१४ केर तुलनामे २०२२ मे अनुसूचित जाति/अनुसूचित जनजाति महिला आ बच्चाक विरुद्ध अपराधमे १.७ गुना वृद्धि देखल गेल।”
कांग्रेसक महासचिव (संगठन) केसी वेणुगोपाल प्रधानमंत्रीपर पलटवार करैत कहलनि कि “निष्ठाहीन, प्रतिशोधी आ काज नहिं करयवाला नेता सभकेँ कांग्रेस सरकार पर संदेह करबाक कोनो अधिकार नहिं अछि।
