आम आदमी पार्टी (आप) बृहस्पतिकेँ आगामी हरियाणा विधानसभा चुनावक लेल अपन उम्मीदवारक सातम सूची जारी कयलक। पार्टी सूचीमे ३ टा नामक घोषणा कयलक। एकरा संग आम आदमी पार्टी हरियाणाक सभ ९० विधानसभा सीटपर अपन उम्मीदवार उतारने अछि।
पार्टी अपन अंतिम सूचीमे आदर्श पालकेँ टिकट देलक अछि। जे १२ सितंबर, बृहस्पतियेकेँ कांग्रेस छोड़ि आम आदमी पार्टीमे शामिल भेलथि।
एकर अलावा आम आदमी पार्टी नारनौंदसँ रणवीर सिंह लोहानकेँ मैदानमे उतारलक अछि, जखनि कि राबिया किदवईकेँ नूंहसँ अपन उम्मीदवार बनौलक अछि।
एहि तरहेँ आब तस्वीर स्पष्ट भऽ गेल अछि जे हरियाणामे कांग्रेस आ आम आदमी पार्टीक बीच कोनो गठबंधन नहिं अछि। दुनू दल राज्यमे अलग-अलग चुनाव लड़य जा रहल अछि। मुदा, हरियाणा चुनावक लेल सीटक बंटवाराकेँ लऽ कऽ कांग्रेस आ आम आदमी पार्टीक बीच बहुत दिन धरि माथापच्ची चलैत रहल। मुदा दुनू दलक बीच सीट बंटवाराक फार्मूला तय नहिं भऽ सकल।
हरियाणा विधानसभा चुनावक लेल नामांकन दाखिल करबाक बृहस्पति दिन अन्तिम दिन छल। दोसर दिसि, कांग्रेस हरियाणाक ९० सीटमेसँ ८८ उम्मीदवारक नामक घोषणा कयलक अछि।
एहिसँ पहिने आम आदमी पार्टी हरियाणा चुनावक लेल अपन छठम सूचीमे १९ उम्मीदवारक नामक घोषणा कयलक
२०१९ केर हरियाणा विधानसभा चुनावक बात करब तँ भारतीय जनता पार्टी आ जेजेपी राज्यमे गठबन्धन कऽ सरकार बनौलक। मुदा, दुनू दल २०२४ केर लोकसभा चुनावमे आम सहमति पर नहिं पहुँचि सकल। जकर बाद जेजेपी भाजपाक संग गठबंधन तोड़बाक घोषणा कयलक। वर्तमानमे राज्यमे भाजपाक सरकार अछि आ मुख्यमन्त्री नायब सिंह सैनी छथि।
