कांग्रेस नेता राहुल गांधी आ प्रियंका गांधी वाड्रा पेटीएम पेमेंट्स बैंकक खिलाफ भारतीय रिजर्व बैंक (आरबीआई) केर कार्रवाई पर केंद्र पर प्रहार करैत दावा कयलनि कि मोदी सरकारक तहत नियामक संस्थान केर ‘नष्ट’ कयल जा रहल अछि।
पेटीएम पेमेंट्स बैंक (पीपीबीएल) के खिलाफ एकटा पैघ कार्रवाईमे आरबीआई बुधकेँ बैंक केर निर्देश देलक जे २९ फरवरीक बाद कोनो ग्राहक खाता, वॉलेट, फास्टैग आ अन्य उपकरणमे जमा टॉप-अप स्वीकार नहिं करय।
राहुल गांधी सोशल मीडिया प्लेटफॉर्म ‘एक्स’ पर पोस्ट कयलनि, ‘पेटीएम फ्राॅड’ एहि बातक सबसँ पैघ उदाहरण अछि जे कोना सरकार संस्थानक स्वतन्त्रताकेँ नष्ट कऽ देशकेँ बर्बादीक पथ पर अनलक। प्रधानमंत्रीक फोटोक संग अखबारमे फूल पेज विज्ञापन देबयवाला पेटीएम पेमेंट्स बैंकक फ्राॅड पर सेबी आ आरबीआई सन नियामक संस्थान मूक दर्शक बनल रहल,” ओ कहलखिन, “बहुत रास कंपनी जे लोकक मेहनतसँ अर्जित पाइ लूटि कऽ पैघ बनि गेल अछि, ओकरा एहन राजनीतिक संरक्षणसँ संरक्षित कयल गेल अछि। नियामक संस्थानक पतन जनताक सङ्ग लूटपाटक गारंटी अछि।”
प्रियंका गाँधी वाड्रा कहलनि जे पेटीएमकेँ नोटबन्दीसँ भारी मुनाफा भेल आ विज्ञापनक अनुसार एहिमे सरकारी सहायता सेहो शामिल छल। ओ कहलनि “जखन कंपनी बहुत बेसी दाम पर अपन शेयर जारी केलक, तखन आम मध्यम वर्गक भारतीय लोकनि ओकरा पैघ संख्यामे कीनि लेलनि।”
कांग्रेस महासचिव कहलनि “अचानक, काल्हि आरबीआई वित्तीय अनियमितताक कारण एहि कंपनीक कामकाज पर रोक लगा देलक।” ओ कहलनि जे पेटीएमक शेयरमे ७५ प्रतिशतक गिरावट आयल अछि आ प्राप्त समाचारक अनुसार कथित रूपसँ लगभग १८,००० करोड़ टाकाक नोकसान भेल अछि।
आगू वाड्रा कहलनि “ई हजारो आ लाखो ईमानदार भारतीयक कमाइक हानि अछि जे एहि कम्पनीक शेयर किनने छलाह। मोदी जीक शासनकाल मे देशक सभ संस्थान नष्ट भs रहल अछि। जँ सेबी आ आरबीआई आइ स्वतंत्र होइत तऽ आम भारतीयक ई पाइ बचाओल जा सकैत छल।”
