केपी शर्मा ओली पुनः नेपालक प्रधानमन्त्री बनल छथि। रामचन्द्र पौडेल नव गठबन्धन सरकारक नेतृत्व करबाक लेल केपी शर्मा ओलीकेँ चारिम बेर देशक प्रधानमन्त्रीक रूपमे नियुक्त कयने छथि। ओ संसदक सबसँ पैघ दल नेपाली कांग्रेसक समर्थनसँ प्रधानमन्त्री बनलाह। आब प्रधानमंत्री नरेन्द्र मोदी एक्स पर पोस्ट लिखि केपी शर्मा ओलीकेँ बधाई देलनि अछि।
ओलीकेँ राष्ट्रपति रामचन्द्र पौडेल द्वारा पदक शपथ दियाओल गेल। पुष्प कमल दहल विश्वास मत जीति नहिं सकल छलथि।
केपी शर्मा ओली आइ चारिम बेर नेपालक प्रधानमन्त्रीक रूपमे शपथ लेलनि। नेपालक सबसँ पैघ कम्युनिष्ट पार्टीक नेताकेँ राष्ट्रपति रामचन्द्र पौडेल रविदिन नेपालक प्रधानमन्त्रीक रूपमे नियुक्त कयलनि। प्रधानमन्त्री नरेन्द्र मोदी नेकपा (एमाले)क अध्यक्ष केपी शर्मा ओलीकेँ नेपालक प्रधानमन्त्रीक रूपमे नियुक्ति पर बधाई दैत कहलनि जे ओ दुनू देशक बीच मित्रताकेँ आओर सुदृढ़ करबाक लेल हुनका सङ्ग काज करबाक लेल तत्पर छथि।
ओलीकेँ बधाई दैत मोदी एक्स पर कहलनि, “हम अपन दुनू देशक बीच मित्रताक गहन बंधनकेँ आओर मजबूत करबाक लेल आ अपन लोकक प्रगति आ समृद्धिक लेल अपन पारस्परिक लाभदायक सहयोगकेँ आओर विस्तारित करबाक लेल मिलिकऽ काज करबाक लेल तत्पर छी।
७२ वर्षीय ओली पुष्प कमल दहल ‘प्रचण्ड’क स्थान लेताह, जे हालहिमे शुक्रदिनक प्रतिनिधि सभामे विश्वास मत हारि गेलाह, जाहिसँ संविधानक अनुच्छेद ७६ (२)क अनुसार नव सरकारक गठन भेल।
ओ संसदक सबसँ पैघ दल नेपाली कांग्रेसक समर्थनसँ प्रधानमन्त्री बनलाह। राष्ट्रपति भवनक मुख्य भवन शीतल निवासमे राष्ट्रपति रामचन्द्र पौडेल द्वारा ओलीकेँ पदक शपथ देल गेल। ओलीकेँ आब संवैधानिक आदेशक अनुसार अपन नियुक्तिक ३० दिनक भीतर संसदसँ विश्वास मत लेबय पड़तनि। ओलीकेँ २७५ सीटवला प्रतिनिधि सभामे न्यूनतम १३८ मतक आवश्यकता अछि।
