परिवारवाद पर हमला करैत संबित पत्रा कहलनि जे, राजद आ कांग्रेस नेतृत्वक महागठबंधनमे शामिल सब लोकक मानब अछि जे लोकतंत्र रहय वा नहि रहय, मुदा परिवार बनल रहबाक चाही। हम नहि पाकिस्तानख एटम बमसँ डरैत छी आ नहि कोनो आन चीजसँ।
दिल्लीमे मतदाता सूचीक विशेष गहन संशोधन (एसआईआर) केर विवाद चरम पर अछि। राष्ट्रीय जनता दल (राजद) केर नेता आ पूर्व उपमुख्यमंत्री तेजस्वीक दावा अछि जे बिहारक मतदाता सूचीक मसौदामे हुनकर नाम गायब अछि। हुनक एही दावाकेँ चुनाव आयोग निराधार बतेलक। आब भारतीय जनता पार्टी सेहो एहि दावा पर मुखर भऽ गेल अछि। भाजपा प्रवक्ता संबित पात्रा कहलनि जे, तेजस्वी काल्हि अपन प्रेस कांफ्रेंसक माध्यमसँ भ्रम पसारय केर कोशिश कयलनि। तेजस्वीक 2-2 EPIC नंबर कोना भेटल ?
आयोग द्वारा जारी मतदाता सूचीक मसौदाक बाद विवाद बढ़ल अछि। भाजपा प्रवक्ता संबित पात्रा काल्हि रविदिन एकटा प्रेस कांफ्रेंसमे कहलनि जे, “पिछला किछु सालसँ विपक्ष संवैधानिक संस्था पर झूठ हमला कय रहल अछि आ इ हुनकर साजिश अछि। तेजस्वी यादव काल्हि अपन प्रेस कॉन्फ्रेंसक माध्यमसँ भ्रम पसारि देलनि। तेजस्वी कहलनि जे जखनि हम अपन ईपीआईसी नंबर चुनाव आयोगक वेबसाइट पर दर्ज कयलौंह तँ हमर नाम नहि आयल। ओ कहलनि जे हमर नाम हटा देल गेल अछि। हम “चुनाव नहि लड़ि सकैत छी।”
पात्रा कहलनि, “तकर बाद जे भेल से बहुत चौंकाबय वाला छल। पटनाक जिला मजिस्ट्रेट पूरा सच्चाई केर सामने राखि देलनि। ओ कहलनि जे हुनकर नाम डिलीट नहि भेल अछि, मुदा एकर बाद ओ कहलनि जे जाहि नंबरसँ हुनक नाम आयल अछि ओ ओहि नंबरक अछि जाहिसँ ओ पिछला चुनाव लड़ने छलाह। “ओ तेजस्वीसँ पूछताछ करैत बजलाह, “2 टा ईपीआईसी नंबर कोना भेटल ? की तेजस्वी लग 2 टा वोटर आईडी कार्ड अछि ? ई एकटा अपराध अछि। ई देशक लोकतंत्रक संग मजाक अछि। की ओ कतहु नकली वोटर कार्ड बनौने छथि ? 2020 मे जाहि वोटर नंबरसँ चुनाव लड़लनि आ एहि बेर हुनका लेल बनल कार्ड ओहिना अछि।”
भाजपा नेता पात्रा कहलनि जे, जखनि नेता सबहक ई हालत होयत तखनि कार्यकर्ताक कतेक मतदाता आईडी कार्ड होयत। ओ कहलनि जे मुख्य मतदाता सूची पर भ्रम पसारय केर साजिश रचल जा रहल अछि।
एकर संग-संग संबित पत्रा पूछलनि जे की इएह कारण छल जे ओ सभ एसआईआर केर विरोध कय रहल छलथि ? हुनका सब लग 2-2 मतदाता आईडी कार्ड अछि। जखनि नेताक ई हालत तखनि कार्यकर्ताक ? हम हुनकर सबहक पिछला 2 चुनावक हलफनामा सेहो अहाँ सबकेँ सामने अनने छी।
नेपोटिज्म पर हमला करैत पात्रा कहलनि जे, राजद आ कांग्रेस नेतृत्वक महागठबंधनमे शामिल सब लोकक मानब अछि जे लोकतंत्र रहय वा नहि रहय, मुदा परिवार अवश्य रहबाक चाही। हम सब नहि पाकिस्तानक एटम बमसँ डरैत छी आ नहि कोनो आन चीजसँ।
एहिसँ पहिने चुनाव आयोग तेजस्वीक दावाकेँ निराधार बतेलक जे मतदाता सूचीक मसौदामे हुनकर नाम गायब अछि। आयोगसँ जुड़ल सूत्रक अनुसार दोसर मतदाता आईडी कार्ड मसौदामे शामिल नहि कयल गेल अछि। एकर पाछूक ‘वास्तविकता’क लेल जांच जारी अछि। संभव अछि जे 2 टा’ मे सँ 1टा आयोग कैंसिल कय देने होयत।
