नीट पेपर लीक मामिलामे सीबीआई लगातार कारवाईमे लागल अछि। एहि मामिलामे सीबीआई पटना एम्सक छात्र सभकेँ गिरफ्तार कयलक अछि।
नीट पेपर लीक मामलामे पटना एम्सक नाम पर सेहो चर्चा चलि रहल अछि। सीबीआई पटना एम्सक छात्र सभकेँ गिरफ्तार कयलक अछि। संगहि कॉलेज प्रशासनक रुख सेहो एहि पर सामने आबि गेल अछि। पटना एम्सक निदेशक डॉ. जीके पॉल शुक्रकेँ कहलनि कि हम सब आरोपी छात्रकेँ निलंबित करब। आइ हम एहि संबंधमे प्रशासनिक समितिक संग बैसार कयलहुँ। पटना एम्सक प्रतिष्ठा खराब होबए केर कारण एहेन काज करय वाला छात्रक खिलाफ कारवाई होएत।
डॉ. जीके पॉल कहलनि जे एहेन बुझाइत अछि जे सीबीआई लग सबूत अछि तखने पटना एम्सक छात्र सभकेँ गिरफ्तार कए रिमांड पर लेल गेल अछि। चारु आरोपी छात्र पढ़बामे बहुत नीक छथि। ओ पहिल प्रयासमे परीक्षा उत्तीर्ण कयने छलाह, एतय प्रथम श्रेणीमे उत्तीर्ण कयलनि। उपस्थिति सहित एहि लोकसभक अकादमी ट्रैक रिकॉर्ड सेहो बहुत नीक अछि।आरोपीक पहिचान चन्दन कुमार, राहुल कुमार, करण जैन आ कुमार सानूक रूपमे भेल अछि।
सीबीआई बृहस्पति दिन भोरे सॉल्वर गिरोहसँ जुड़ल पटना एम्सक चारु टा मेडिकल छात्रकेँ गिरफ्तार कयलक। एहि छात्रसभ पर आरोप अछि जे पेपर लीक भेलाक बाद ओ सभ प्रश्नक समाधान कयने छलाह, जकर बाद परीक्षा देबय बला अभ्यर्थी सभसँ उत्तर रटबायल गेल छल। संगहि सीबीआइक एखन धरिक जाँचमे एहि बातक पर्याप्त प्रमाण भेटल अछि जे नीट-यूजीक पेपर झारखण्डक हजारीबागसँ लीक भेल छल। एजेंसी हजारीबागमे परीक्षा केन्द्रक लेल बनल प्रश्न पत्र चोरी करबाक आरोपमे एकटा इंजीनियर पंकज कुमारकेँ पटनासँ गिरफ्तार कयने छल।
पंकज हजारीबाग स्थित राज गेस्ट हाउसक संचालक राजू सिंहकेँ चोरीक प्रश्न पत्र उपलब्ध करा देने छलाह आ ओकर बाद पेपर पटना भेजल गेल छल, जतय छात्रावासमे रहय वाला चयनित अभ्यर्थीकेँ रातोरात सवालक उत्तर रटबायल गेल छल।
जाञ्चमे इहो पता चलल अछि जे हजारीबागमे स्थित गेस्ट हाउसमे किछु छात्रकेँ रोकल गेल आ प्रश्नक उत्तर रटबाओल गेल छल। वर्तमानमे सीबीआई रिमांड पर पंकज कुमार आ राजू सिंहसँ पूछताछ कऽ रहल अछि।
एजेंसी हजारीबाग स्थित ओएसिस स्कूलक प्रधानाचार्य आ एनटीए शहर समन्वयक एहसान-उल-हक, उप-प्राचार्य मोहम्मद इम्तियाज आ एकटा दैनिक अखबारक पत्रकार जमालुद्दीनकेँ २८ जूनकेँ गिरफ्तार कयने छल। जेना-जेना जाञ्चक दायरा बढ़ैत जा रहल अछि, एहि पूरा घोटालामे शामिल लोकक नाम आ चेहरा एक-एक कऽ सामने आबि रहल अछि।