गुजरातक पोरबंदर हवाई अड्डापर एकटा पैघ दुर्घटना भेल अछि। तटरक्षक बलक एकटा हेलीकॉप्टर ओतय दुर्घटनाग्रस्त भऽ गेल। एहि दुर्घटनामे तीन गोटेक मृत्यु क सूचना अछि।
भारतीय तटरक्षक हेलीकॉप्टर एएलएच (एडवांस्ड लाइट हेलीकॉप्टर) ध्रुव नियमित उड़ान पर छल, जखन ओ दुर्घटनाग्रस्त भऽ गेल। एहि दुर्घटनामे चालक दलक सदस्य सहित तीनटा लोकक मृत्यु भऽ गेल। चालक दलक सदस्यकेँ जरल हालातमे अस्पतालमे भर्ती कराओल गेल छल, मुदा इलाजक क्रममे हुनकर मृत्यु भऽ गेलनि।
मीडिया रिपोर्टक अनुसार, तटरक्षक हेलीकॉप्टर रविदिन दुपहरिया लगभग १२ बजे पोरबंदरमे दुर्घटनाग्रस्त भऽ गेल। हेलीकॉप्टर नियमित उड़ान पर छल आ हेलीकॉप्टर लैंडिंग केर दौरान दुर्घटना भेल। लैंडिंग केर दौरान हेलीकॉप्टरमे आगि लागि गेल। हेलीकॉप्टरमे दूटा पायलट सहित तीन गोटे छलाह। एहि दुर्घटना मे तीनू गोटेक मृत्यु भऽ गेल। पोरबंदरक एसपी भगीरथसिंह जडेजा कहलनि जे पुलिस आ तटरक्षक बल दुर्घटनाक कारणक जाँच कऽ रहल अछि।
ध्रुव हेलीकॉप्टर कतेको बेर दुर्घटनाक शिकार भेल अछि।
उल्लेखनीय अछि जे पछिला साल सितम्बरमे भारतीय तटरक्षक बलक ध्रुव हेलीकॉप्टर अरब सागरमे दुर्घटनाग्रस्त भऽ गेल छल। ओहि दुर्घटनामे चालक दलक तीनटा सदस्य लापता भऽ गेलाह। चालक दलक एकटा सदस्यकेँ बचा लेल गेल छल। एहिसँ पहिने मार्चमे नौसेनाक ध्रुव हेलीकॉप्टरकेँ अरब सागरमे आपात लैंडिंग करय पड़ल छल।
ध्रुव हेलीकॉप्टरक निर्माण हिन्दुस्तान एयरोनॉटिक्स लिमिटेड द्वारा कयल गेल छल। कतेको सालक परीक्षण उड़ानक बाद एकरा २००२ मे भारतीय वायुसेनामे शामिल कयल गेल छल। हेलीकॉप्टरमे दूटा पायलट सहित १२ गोटे रहि सकैत छथि। एकर उपयोग सैन्य आ नागरिक दुनू उद्देश्यक लेल कयल जा सकैत अछि। ध्रुव हेलीकॉप्टरकेँ टैंक रोधी निर्देशित मिसाइलसँ सेहो सुसज्जित कयल जा सकैत अछि। संगहि, हवासँ हवामे मारि करय बला मिसाइल सेहो एहिसँ दागल जा सकैत अछि। ध्रुव हेलीकॉप्टर अपन केटेगरीक सर्वश्रेष्ठ हेलीकॉप्टर मानल जाइत अछि।
