जन सूराज पार्टीक संस्थापक आ चुनाव रणनीतिकार प्रशांत किशोर शनिदिन नालंदा जिलाक एकंगरसराईमे एकटा विशाल जनसभाकेँ संबोधित करैत सत्तारूढ़ राजग आ मुख्यमंत्री नीतीश कुमार पर हमला कयलनि। ओ कहलनि जे आब बिहारक जनताकेँ नेताक नाम पर नहि, बल्कि अपन बच्चाक भविष्य लेल वोट देबाक चाही।
ई प्रशांत किशोरक ‘बिहार बदलाव यात्रा’ केर तहत नालंदा आ नवादाक एक दिनक दौरा छल। जिलामे प्रवेश करैत देरी ढोलक आ तुरहीसँ भव्य स्वागत कयल गेल। फूल आ मालासँ लदल हुनकर काफिलाक पाछु गाड़ीक नमहर कतार देखबामे आयल। श्री सुखदेव हाई स्कूल मैदानमे आयोजित जनसभामे हजारों लोक जमा भेल, जतय स्थानीय कार्यकर्ता हुनका शाल ओढ़ा सम्मानित कयलनि।
सभाकेँ संबोधित करैत प्रशांत किशोर कहलनि, पिछला तीन सालसँ गाम-गाम घुमैत छी आ आइयो बिहारमे बच्चा सब लग पहिरबाक लेल कपड़ा आ चप्पल नहि अछि। डबल इंजन सरकार पर तंज कसैत ओ कहलनि जे नेताकेँ जनताक बच्चासँ कोनो मतलब नहि अछि, ताहि लेल आब लोककेँ अपने जागरूक होबय पड़त।
राजद सुप्रीमो लालू प्रसाद यादवक उदाहरण दैत प्रशांत किशोर कहलनि जे, लालू जी केर बेटा 9वीं पास नहि अछि, तइयो हुनका राजा बनाबय चाहैत छथि, जखनिकि बिहारकेँ पढ़ल-लिखल युवाकेँ नौकरी नहि भेटि रहल अछि। ओ कहलनि जे, एहि बेर लालू, नीतीश वा मोदीक नाम पर नहि, अपन बच्चाक भविष्यक लेल वोट करू।
सभामे फैक्ट्री आ औद्योगीकरणक मुद्दा उठबैत प्रशांत किशोर कहलनि जे जखनि बिहारसँ वोट भेटैत अछि तखनि बिहारमे सेहो फैक्ट्रीक स्थापना हेबाक चाही। ओ पुछलनि, “ई फैक्ट्री गुजरातमे लगाओल जाए आ की बिहारमे ?” तँ उपस्थित लोक एक स्वर मे बजलाह – “बिहारमे।”
सभाक अंतमे प्रशांत किशोर सीधा जनतासँ पूछलनि जे की एक बेर फेर नीतीश कुमारकेँ मुख्यमंत्री बनाबय चाहैत छी वा हुनका ‘बाय-बाय’ कहय केर चाही ? हजारों लोक हाथ उठा नीतीश कुमारकेँ बायबाय करय लेल तैयार भेल। एतेक धरि जे प्रशांत किशोर कहलनि जे, “प्रधानमंत्री नरेंद्र मोदीयो एहि बेर नीतीश कुमारक लेल वोट मांगथि, मुदा हुनका वोट नहि दिअ।”
