बिहारक मुख्यमंत्री नीतीश कुमारक पुत्र निशांत कुमार राजनीतिमे शामिल होयबाक लेल तैयार छथि। ओना नीतीश कुमार एखनि धरि राजनीतिमे परिवारवाद लेल विरोधीसभ पर हमला करैत आबि रहल छथि, मुदा निशांतक राजनीतिमे प्रवेशक लऽकऽ जेडीयूमे मंथनक दौर चलि रहल अछि। जदयू केर बहुत रास नेता हुनकर स्वागतक लेल तैयार छथि।
वास्तवमे बिहारक राजनीतिक गलियारामे नीतीश कुमारक उत्तराधिकारीक लेल चर्चा भेल अछि। मानल जाइत अछि जे जँ चर्चाकेँ सत्य मानल जाय आ यदि निशान्त राजनीतिमे अबैत छथि तखन हुनका नीतीशक उत्तराधिकारीक रूपमे देखल जा सकैत अछि। सूत्रक अनुसार परिवारक सदस्यक अतिरिक्त पार्टीक कतेको नेता सेहो एहि पर सहमत भऽ गेल छथि। एहि लेल कहल जा रहल अछि जे होलीक बाद निशांत कुमार औपचारिक रूपसँ अपन राजनीतिक यात्रा शुरू करय जा रहल छथि।
जदयू नेता आ बिहारक मंत्री अशोक चौधरी कहलनि, “जँ हमर बेटी राजनीतिमे आबि सकैत अछि तँ ओ किएक नहि कऽ सकैत अछि ? जँ निशांत राजनीतिमे शामिल होएत तऽ हम हुनकर स्वागत करब। ओना, ओ नीतीश कुमारक नाम लेने बिना हुनका दिसि इशारा करैत कहलनि, “ई निर्णय हमर नेताकेँ करबाक अछि।” मंत्री अशोक चौधरीक बेटी शाम्भवी चौधरी लोक जनशक्ति पार्टी (राम विलास)क टिकट पर समस्तीपुरसँ सांसद बनल छथि।
एहि पर जदयू नेता आ पूर्व सांसद आनंद मोहन सिंह कहलनि जे ई सब हमर विषय नहि अछि। “पत्रकारक बेटा पत्रकार होइत अछि, डॉक्टरक बेटा डॉक्टर होइत अछि, इंजीनियरक बेटा इंजीनियर होइत अछि। जँ निशान्त राजनीतिमे जयबाक निर्णय लैत छथि तखनि नव पीढ़ीक स्वागत सभगोटे करत।”
मुख्यमंत्री नीतीश कुमारक बेटा निशांत कुमारक राजनीतिक पारी लेल बहुत अटकल लागल अछि। निशान्त कुमार अपन दादाक सम्मानमे आयोजित एकटा समारोहमे भाग लेबाक लेल अपन गृह क्षेत्र बख्तियारपुर गेलाह आ पिताक काजक कारण हुनका पुनः मुख्यमंत्रीक रूपमे चुनल जयबाक अपील कयलनि। ओकर बाद ई चर्चा शुरू भेल जे हुनकर राजनीतिक पारी जल्दिये शुरू भऽ सकैत अछि।
चर्चा अछि जे निशान्त कुमारक राजनीतिक पारी होलीक बाद शुरू भऽ सकैत अछि। मुदा, जेडीयू दिसिसँ एखनि धरि एहि सम्बन्धमे कोनो आधिकारिक बयान नहि आयल अछि। एहि सालक अंतमे विधानसभा चुनाव होबय जा रहल अछि आ एहेन स्थितिमे जँ निशांत कुमार चुनाव मैदानमे उतरैत छथि तऽ मानल जा रहल अछि जे कार्यकर्ताक मनोबल बढ़त। इहो चर्चा अछि जे निशांत आगामी विधानसभा चुनावमे सेहो अपन भाग्य आजमा सकैत छथि।
