बिहारक मुख्यमंत्री नीतीश कुमार कुल ४८ हजार बाढ़ि पीड़ित परिवारक लेल सहायता राशि डीबीटी केर माध्यमसँ देबय केर घोषणा कयलनि। ई राशि ९ अक्टूबरकेँ देल जाएत।
बिहारक कतेको जिला बाढ़िसँ प्रभावित अछि। एम्हर मुख्यमंत्री नीतीश कुमार बाढ़ि पीड़ितक सहायता राशि देबय केर घोषणा कयलनि अछि। शुक्रदिन मुख्यमंत्री नीतीश कुमार बाढ़िक जायजा लेबाक लेल दरभंगा पहुँचलाह। एतय मुख्यमंत्री खाद्य पैकेजिंग सेंटरक निरीक्षण कयलनि। एहि अवसर पर मुख्यमंत्री नीतीश कुमार एकटा पैघ घोषणा कयलनि जे बाढ़ि पीड़ितकेँ डीबीटीक माध्यमसँ सात हजार रुपयाक सहायता देल जायत।
ई राशि दुर्गा पूजा सँ पहिने ९ अक्टूबरकेँ देल जायत। कुल ४८ हजार बाढ़ि पीड़ितक सहायता कयल जायत। निरीक्षणक दौरान मुख्यमंत्री नीतीश कुमार दरभंगामे अधिकारी सभकेँ निर्देश सेहो देलनि। मुख्यमंत्री दरभंगाक बिरौलमे बाढ़ि प्रभावित लोकक बीच चेक सेहो वितरित कयलनि।
बृहस्पति (०३ अक्टूबर) केँ जारी रिपोर्टक अनुसार गंडक, कोसी, बागमती, महानन्दा आ अन्य नदीमे बाढ़िक कारण लगभग १८ जिला प्रभावित अछि। एहिमे पूर्वी चम्पारण, पश्चिम चम्पारण, मुजफ्फरपुर, शिवहर, सीतामढ़ी, अररिया, किशनगंज, कटिहार, पूर्णिया, मधुबनी, दरभंगा, समस्तीपुर, सुपौल, मधेपुरा, सहरसा, गोपालगंज, सारण आ खगड़िया सम्मिलित अछि। एहि जिलाक ८८ प्रखंडक ४७९ ग्राम पंचायतक अन्तर्गत लगभग १६.०५ लाख लोक बाढ़िसँ प्रभावित छथि।
एनडीआरएफ आ एसडीआरएफक टीम राहत कार्यमे लागल अछि।
जिला प्रशासन द्वारा एसडीआरएफ आ एनडीआरएफ आ स्थानीय नावक माध्यमसँ लगभग १८,००० लोककेँ सुरक्षित स्थानपर आनल गेल अछि। जिला प्रशासन द्वारा आन राहत कार्य कयल जा रहल अछि। बाढ़ि प्रभावित क्षेत्रमे एनडीआरएफक कुल १७ दल आ एसडीआरएफक १९ दल तैनात कयल गेल अछि। बाढ़ि प्रभावित क्षेत्रमे जिला प्रशासन द्वारा ४५१ सामुदायिक भनसाघर केन्द्र संचालित कयल जा रहल अछि। एकर माध्यमसँ लगभग २.५४ लाख लोक (प्लेटक संख्या) केँ भोजन देल जा रहल अछि।
