मुख्यमंत्री नीतीश कुमार आइ फेर स्पष्ट कयलनि जे ओ राष्ट्रीय जनतांत्रिक गठबंधनक हिस्सा बनल रहताह। एतबे नहि, ओ राष्ट्रीय जनता दल सुप्रीमो लालू प्रसाद यादवक प्रस्तावक जवाब सेहो एकटा सन्देशक माध्यमसँ देलनि। ओ कहलनि, “हम गलतीसँ दू बेर हुनका संग गेल छलहुं, मुदा आब हम हुनका छोड़ि एतय आबि गेल छी। आब पुराने संगिक संग छी।”
आगू नीतीश कुमार कहलनि, ओ सभ बिहारक लेल किछु नहि कयलनि। महिलाक लेल सेहो किछु नहि कयलनि। की साँझक बाद कियो घरसँ बाहर निकलैत छल ? हम 2005 सँ बहुत किछु कए चुकल छी। सबहक विकासक लेल काज कयलौंह। हम हिन्दू-मुस्लिम, गड़ा-पिछड़ा, दलित-महादलित सहित समाजक सभ वर्गक लेल काज कयलौंह।
मुख्यमंत्री नीतीश कुमार लालू-राबड़ी राजकेँ मोन पाड़ि देलखिन जे सबके पता अछि जे पहिने महिलाक की स्थिति छल। लोक साँझमे घरसँ बाहर नहि जाइत छल। ओ लोकनि महिलाक उत्थानक लेल कोनो काज नहिं कयलनि। जहियासँ हमर सरकार सत्तामे आयल अछि, महिलाक उत्थानक लेल बहुत रास काज कएल गेल अछि। परिणामस्वरूप आइ बहुत बदलाव देखा रहल अछि। हमसभ एकटा स्व-सहायता समूह बनौलहुँ आ एकर नाम ‘जीविका’ रखलहुँ। जीविका समूहमे शामिल होबयवला महिलासभक स्थितिमे महत्वपूर्ण परिवर्तन भेल अछि। अहां देख सकैत छी जे जीविका दीदी कतेक नीक काज कए रहल छथि। जखनि जीविका बिहारमे नीक काज करय लागल तखनि तत्कालीन केंद्र सरकार एकर सराहना कयलक आ ओकर तर्ज पर ‘आजीविका’ नाम दऽ कए पूरा देशमे एकरा चलाओल गेल। बहिनसभकेँ जे रोजी-रोटीक जरूरत अछि ओकरा हम पूरा करैत छी। हम जीविका दीदीकेँ आगू लए जा रहल छी। हम राज्यक विकासक लेल लगातार काज कए रहल छी। ई सब बात मुख्यमंत्री नीतीश कुमार मुजफ्फरपुरमे प्रगति यात्राक दौरान कहलनि।
मुख्यमंत्री नीतीश कुमार रविक अपन ‘प्रगति यात्रा’क दोसर चरणमे मुजफ्फरपुर जिलाक लेल 45,140.12 करोड़ टाकाक विकास परियोजनाक घोषणा कयलनि। ओ 76 योजनासँ सम्बन्धित पट्टिकाक अनावरण कयलनि आ काजक आरंभ, शिलान्यास आ उद्घाटन कयलनि। एहिमे 9405.46 लाख टाकाक लागतसँ 51 योजनाक उद्घाटन आ 24590.31 लाख टाकाक लागतसँ 23 योजनाक उद्घाटन एवं 11144.35 लाखक लागतसँ दूटा योजनाक कार्यारंभ सम्मिलित अछि।
