राजस्थानमे चुरू केर लोकक बीच पहुँचल पीएम मोदी कहलनि कि हमर सामाजिक संरचना एहन रहल अछि जे घर, गाड़ी, खेत सहित सब किछु पुरुषक नाम पर रहैत अछि। मुदा मोदी निर्णय कयलक जे सरकार द्वारा देल गेल घर महिलाक नाम पर होयत।
लोकसभा चुनावक परिप्रेक्ष्यमे प्रधानमंत्री नरेन्द्र मोदी आइ राजस्थानक चुरूमे एकटा चुनावी जनसभाकेँ सम्बोधित कयलनि। एहि दौरान पीएम मोदी कहलनि जे राजस्थान सहित पूरा देशक जनता लगातार तेसर बेर केंद्रमे मजबूत सरकार बनेबाक संकल्प लेलक अछि। एकर सङ्गहि ओ हुनका आशीर्वाद देबय लेल आयल पैघ संख्यामे लोकसभकेँ अभिवादन कयलनि। पीएम मोदी कहलनि, “चुरू बता देलक अछि जे ४ जून ४०० केर पार होयत।” से होबए जा रहल अछि।
चुरूक लोकक बीच पहुँचल पीएम मोदी कहलनि जखनि राजस्थानक विकास होयत तखन भारत सेहो विकसित होयत। पछिला १० सालमे पीएम मोदी देशक लेल कयल गेल काजसँ विकसित भारतक नींव तैयार कयलक अछि।
पछिला कांग्रेस सरकार पर हमला करैत पीएम मोदी कहलनि जे १० साल पहिने देशक स्थिति खराब छल। कांग्रेसक पैघ घोटाला आ लूटक कारण अर्थव्यवस्था धराशायी भऽ गेल छल आ करोड़ों गरीब लोकक माथ पर छत तक नहिं छल।
पीएम मोदी कहलखिन कि हुनकर सरकार हर मुस्लिम परिवारक रक्षा कयलक अछि। पहिने मुसलमान परिवारक प्रत्येक पिता सोचैत छलाह जे बेटीक विवाह तऽ भऽ गेल, मुदा जँ २-३ गोट संतान भेलाक बाद ओकरा तीन तलाक कय विदा कऽ देल जायत तखन ओ बेटीकेँ कोना सम्हारत। मुदा ई सरकार तीन तलाक पर कानून आनि एहि कुप्रथाकेँ समाप्त कऽ देलक।
भाजपाक काजक उल्लेख करैत पीएम मोदी कहलनि जे एखन धरि जे काज भेल अछि ओ मात्र एकटा ट्रेलर अछि। मोदी जे कयलक ओ एकटा ऐपेटाइजर अछि, भोजनक पूरा प्लेट एखन आयब बाँकी अछि। देशकेँ आगू बढ़ेबाक लेल बहुत किछु करय केर अछि, कतेको सपना अछि आ देशकेँ बहुत आगू लऽ जयबाक अछि।
