केंद्रीय मंत्री आ लोक जनशक्ति पार्टीक नेता चिराग पासवान बिहार विधानसभाक सभ 243 सीट पर चुनाव लड़बाक घोषणा काल्हि आरा केर जनसभामे कयने छलथि। हुनकर एहि बयानसँ बिहारमे राजनीतिक गतिविधि बढ़ि गेल अछि। जनता दल यूनाइटेड 2010 केर मॉडलक जिक्र करय लागल अछि। पार्टीक एमएलसी खालिद अनवर कहलनि जे एनडीएकेँ बिहारमे मजबूत प्रदर्शन करबाक चाही आ एहि लेल 2010 केर सीट बंटवारा मॉडल अपनायल जयबाक चाही। अनवर कहलनि जे, “चिराग जी हालमे एनडीएमे शामिल भेल छथि। हमर लक्ष्य अछि जे एनडीए बेसीसँ बेसी सीट जीतय। बिहारमे जदयूक मजबूत आधार आ पकड़ अछि। नीतीश कुमारक नेतृत्वमे हम सब पहिनेसँ बेसी सीट पर चुनाव लड़य चाहैत छी।”
ओ स्पष्ट केलनि जे 2020 केर फॉर्मूलाक जगह 2010 केर मॉडल अपनायल जाएत, जखनि एनडीए शानदार प्रदर्शन कयने छल आ राजदकेँ मात्र 20 सीट पर समेटि देने छल। अनवर कहलनि जे नीतीश कुमार’क नेतृत्वमे जीतक फार्मूला तैयार कयल जाएत। 2010 मे एनडीए 206 सीट जीतल छल।
जदयूक कहनाय अछि जे नीतीश कुमारक नेतृत्वमे एनडीए केर गठबंधन अटूट अछि आओर बिहारमे मजबूत प्रदर्शन करत। अनवर कहलनि जे हमरा सभकेँ पूरा विश्वास अछि जे नीतीशक नेतृत्वमे एनडीए जीतेबे करत, संगहि पहिनेसँ बेसी सीट सेहो जीतत। किछु लोक चिरागक बयानकेँ गठबंधनमे सीटक मोलभाव केर रणनीति मानि रहल छथि, मुदा जदयू एकरा सहयोगी दलक बीच समन्वय केर हिस्सा कहलक अछि।
