लोकसभा चुनावसँ ठीक पहिने बुधदिन चिरागक पार्टीक २२ टा नेता सामूहिक रूपसँ इस्तीफा दऽ देलनि। एहिमे राष्ट्रीय आ राज्य स्तरक अधिकारी शामिल छथि।
भारतक सभ राजनीतिक दल एखन लोकसभा चुनाव २०२४ केर तैयारीमे लागल अछि। एम्हर बिहारक राजनीति रोचक भऽ गेल अछि। भाजपा एनडीए गठबंधनमे पशुपति पारसक बदला चिराग पासवानपर विश्वास व्यक्त कयलक अछि। चिराग पासवानक लोक जनशक्ति पार्टी (राम विलास) केँ एनडीए गठबंधनमे ५ सीट भेटल अछि। मुदा, चुनावसँ ठीक पहिने चिराग पासवानकेँ पैघ झटका लागल अछि। हुनक पार्टीक २२ नेता एक सङ्ग इस्तीफा दऽ देलनि आ चिराग पासवान पर कतेको आरोप लगौलनि अछि।
इस्तीफा देबयवालामे राष्ट्रीय आ राज्य स्तरक अधिकारी शामिल छथि। ई सभ नेता आइ एकटा संयुक्त प्रेस कॉन्फ्रेंसमे चिराग पासवान पर आरोप लगओलनि अछि जे लोकसभा चुनावमे ओ पार्टीक टिकट बाहरी उम्मीदवारकेँ भारी रकममे बेच देलनि।
चिरागक पार्टीसँ आइ इस्तीफा देनिहार नेतामे पार्टीक राष्ट्रीय उपाध्यक्ष आ पूर्व मंत्री रेणु कुशवाहा, पार्टीक राष्ट्रीय महासचिव आ पूर्व विधायक सतीश कुमार, पार्टीक प्रदेश संगठन मंत्री रविन्द्र कुमार सिंह, पार्टीक प्रदेश विस्तार प्रमुख अजय कुशवाहा, संसदीय बोर्डक प्रदेश उपाध्यक्ष कमलेश यादव, प्रदेश महासचिव राजेश दांगी शामिल छथि। प्रदेश महासचिव चितरंजन कुमार, कला संस्कृति आ क्रीड़ा प्रकोष्ठक प्रदेश अध्यक्ष सुधीर प्रसाद यादव, खेल एवं संस्कृति प्रकोष्ठक उपाध्यक्ष अभिनव चन्द्रा, प्रदेश सचिव रंजन पासवान, प्रदेश सचिव अवध बिहारी कुशवाहा आदि शामिल छथि।
लोक जनशक्ति पार्टी (रामविलास) सँ इस्तीफा देबा पर पूर्व विधायक आ लोजपाक राष्ट्रीय महासचिव सतीश कुमार कहलनि कि हम चिराग पासवानमे बहुत संभावना देखलहुं। हम सोचलहुं जे हम बिहारक भविष्य बदलि देब। मुदा पार्टीक सभ कार्यकर्ता टिकट बँटवारा देखि आश्चर्यचकित छथि। टिकट एहन लोककेँ देल गेल अछि जकर बारेमे कियो सोचियो नहिं सकैत अछि।
