चिराग पासवानक लोजपाक शत-प्रतिशत सीटक जीतसँ चिरागक चर्चा चरममे

पटना
*

बिहारमे लोकसभा चुनावमे चिराग पासवानक लोक जनशक्ति पार्टी (राम विलास) पाँचो सीट जीति गेल अछि। एहि जीतक संग चिराग पासवान अपन पिता राम विलासक राजनीतिक विरासतक उत्तराधिकारी बनि गेलाह। संगहि संसदमे एकटा अलग नजारा सेहो देखल जाएत।

बिहारसँ लोकसभा चुनावक परिणाममे लोजपा-राम विलासक स्ट्राइक रेट शत प्रतिशत रहल। पहिल बेर चिराग पासवान अपन पिता रामविलास पासवानक छायाक बिना लोकसभा चुनाव लड़ि रहल छलथि।

एहन स्थितिमे हुनका एनडीएसँ सीट बंटवारामे पांच सीट भेटलनि। ई सभ चिरागक पार्टीक उम्मीदवारक लेल सफल रहल। चिराग स्वयं हाजीपुरसँ पैघ अन्तरसँ जीतलथि।

राजनीतिक विशेषज्ञक मानब छनि जे हाजीपुरसँ पहिल बेर जीतयवाला चिराग ई साबित कऽ देलनि जे ओ रामविलास पासवानक राजनीतिक उत्तराधिकारी सेहो छथि। २०१९ केर चुनावमे लोजपा केर छओ सीट भेटल छल। तखनो लोजपा सभ सीट जीतल छल।

लोजपा-रामविलासक अध्यक्ष चिराग पासवान तेसर बेर चुनाव जीतलाक बाद संसद पहुंचय जा रहल छथि। दोसर दिस हुनकर बहनोई अरुण भारती सेहो जमुई सीटसँ चुनाव जीति संसद पहुंचताह। ई पहिल बेर होयत जखन सार-बहनोई संसदमे एक सङ्ग देखल जायत।

जमुईसँ दू बेर सांसद रहि चुकल चिराग एहि बेर ओतयसँ अपन बहनोईकेँ चुनाव लड़ने छलाह। अपन पार्टीक टिकट पर वैशालीसँ वीणा देवी, समस्तीपुरसँ शाम्भवी चौधरी आ खगड़ियासँ राजेश वर्माक जीत भेल। पछिला बेर चिरागक काका पशुपति कुमार पारस हाजीपुर सीटसँ चुनाव लड़लाह आ जीति कए संसद पहुँचला छलथि।