लोक जनशक्ति पार्टी (लोजपा) प्रमुख चिराग पासवान लोकसभा चुनावक अंतिम चरणसँ पहिने शुक्रदिन अपन परिवारक संग अयोध्यामे रामललाक दरबारमे पूजा-अर्चना कयलनि। एहि दौरान ओ दावा कयलनि जे नरेन्द्र मोदी तेसर बेर प्रधानमन्त्रीक रूपमे शपथ लेताह।
चिराग पासवान रामललाकेँ दर्शन कए हनुमानगढ़ी पहुँचलाह। एहि अवसर पर ओ संवाददाता सभसँ कहलनि जे नरेन्द्र मोदी ४ जूनकेँ तेसर बेर प्रधानमन्त्रीक रूपमे शपथ लेताह जखन परिणाम आओत।
कन्याकुमारीक प्रसिद्ध विवेकानन्द रॉक मेमोरियलक प्रधानमंत्री मोदीक यात्रापर विपक्ष द्वारा सवाल उठयबा पर ओ कहलनि जे विपक्ष कहियो नहिं बुझत। किएकि ओ सनातनकेँ कहियो सम्मान नहिं कयलनि। २०१४ आ २०१९ मे चुनाव प्रचारक बाद प्रधानमंत्री मोदी ध्यान लगा चुकल छथि। तहिना ओ २०२४ मे पहुँचल छथि। हम हुनकर हनुमान छी। एक दिस प्रधानमंत्री ओतय पहुँचल छथि, दोसर दिस हम अयोध्या आयल छी। बहुमत भेटलाक बाद भारत माता की जयक नारा मात्र कहबाक लेल नहिं, बल्कि ओ एकरा हकीकतमे उतारलनि। दुनियामे कोनो एहन देश नहिं अछि जतय भारतक डंका नहिं बाजल अछि। प्रधानमंत्री मोदी भारतक गौरव बढ़ेबाक काज कयलनि अछि।
चिराग कहलनि “भारतकेँ कहियो ‘सोनाक चिड़िया’ कहल जाइत छल। आइ देश सोनाक शेर अछि जे दुनियामे दहाड़ि रहल अछि। भगवानक आशीर्वाद सदैव हुनका सभक संग रहत।”
एहिसँ पहिने ओ सोशल मीडिया प्लेटफॉर्म एक्सक माध्यमसँ लिखलनि जे आइ पवित्र नगरी अयोध्यामे परिवार आ भगवान श्रीरामक दिव्य रूप देखि सभ देशवासीक कल्याणक कामना कयलौंह।
चिराग पीएम मोदीक लेल अपील करैत लिखलनि, “आइ हम पवित्र शहर काशी विश्वनाथक सभ मतदातासँ आग्रह करैत छी जे वाराणसी लोकसभा क्षेत्रसँ एनडीए उम्मीदवार आ विश्व मंच पर देशक नाम रोशन कयनिहार पीएम मोदीकेँ वोट दऽ १ जूनकेँ ऐतिहासिक जीतमे अपन बहुमूल्य योगदान देथि। प्रधानमंत्रीकेँ देल गेल प्रत्येक वोट विकसित भारतक संकल्पकेँ पूरा करत। प्रधानमंत्रीक संकल्प पूरा करबाक लेल जरूरी अछि जे अहाँ सब बेसीसँ बेसी मतदान करू। जतेक बेसी वोट देब, प्रधानमंत्रीक संग देश ओतेक सशक्त आ मजबूत होयत।”
