बिहार विधानसभा चुनाव 2025 केर तैयारीक संबंधमे राजनीतिक गतिविधि तेज भऽ गेल अछि। एहि संबंधमे केंद्रीय मंत्री आ लोक जनशक्ति पार्टी (रामविलास) केर प्रमुख चिराग पासवान एकटा पैघ घोषणा कयलनि। ओ कहलनि जे हुनकर पार्टी बिहारक सबटा 243 विधानसभा सीट पर चुनाव लड़त आ ई लड़ाई राष्ट्रीय लोकतांत्रिक गठबंधन (एनडीए) केँ मजबूत करबाक उद्देश्यसँ लड़ल जाएत। ओ ई बात भोजपुर जिलामे जनसभाकेँ संबोधित करैत कहलनि।
चिराग पासवान स्पष्ट कयलनि जे हुनकर पार्टी एनडीएसँ कोनो तरहेँ अलग नहि अछि, मुदा हुनकर लक्ष्य गठबंधनकेँ बेसी ताकत देब अछि। ओ कहलनि जे हम आ हमर पार्टी बिहारमे 243 सीट पर चुनाव लड़ब जाहिसँ एनडीए मजबूत भऽ जाए आ हम सब एकजुट भऽ जीतक दिसि बढ़ब। अपन संबोधनमे ओ ईहो दोहरौलनि कि लोजपा (रामविलास) केँ हमेशासँ प्रधानमंत्री नरेंद्र मोदीक नेतृत्व पर विश्वास अछि।
भोजपुरक बैसारमे चिराग पासवान तथाकथित ‘जंगल राज’ पर हमला कयलनि। ओ कहलनि जे जखनि हम ‘जंगल राज’क गप करैत छी तँ लोक एकरा केवल राजदसँ जोड़ैत अछि। मुदा सच्चाई ई अछि जे एहि लेल कांग्रेस सेहो ओतबे जिम्मेदार अछि। बिहारमे ओहि अवधिमे दुनू दल सत्तामे साझेदार छल आ राज्य केर अराजकता दिसि धकेलि देलक।
एहि दौरान चिराग पासवान एनडीए सरकारकेँ सामाजिक न्यायक अग्रणी कर्पूरी ठाकुरकेँ ‘भारत रत्न’ देबाक फैसलाकेँ ऐतिहासिक कदम बतेलनि। ओ कहलनि जे, हमर सरकार जीवन भरि पिछड़ा, वंचित आ गरीबक अधिकारक लेल लड़निहार व्यक्तिकेँ सम्मानित करबाक काज कयलक अछि। ई निर्णय हमरा लोकनिक सामाजिक समरसताक संकल्पक प्रमाण अछि।
केंद्रीय मंत्री एवं लोजपा केर राष्ट्रीय अध्यक्ष चिराग पासवान भोजपुरक आरामे बहुत दिन बाद एकटा पैघ सभाकेँ संबोधित कयलनि। एहि दौरान चिराग विधानसभा चुनाव लड़बाक अटकलबाजीकेँ सेहो समाप्त कय देलनि आ कहलनि जे ओ बिहारसँ नहि, बिहार लेल विधानसभा चुनाव लड़ताह। एहि बैसारमे भोजपुर सहित कतेको जिलासँ हजारों कार्यकर्ता आ समर्थक आरा पहुंचल छल।
जनतबक अनुसार लोजपा विधानसभा चुनावक तैयारीक अनौपचारिक घोषणा कयलक अछि। चिराग पासवान नवसंकल्प महासभाक नाम पर सभाकेँ संबोधित कयलनि। ई कार्यक्रम काल्हि आराक वीर कुंवर सिंह स्टेडियममे भेल छल। जतय चिराग पासवान उपस्थित छलाह ओतय पार्टीक पांचो सांसद, प्रदेश अध्यक्ष, संसदीय बोर्डक अध्यक्ष आ जिला अध्यक्ष राजेश्वर पासवान हुनका संग मौजूद छलाह। बताओल जा रहल अछि जे चिराग पासवानक बैसारमे भोजपुर, कैमूर, रोहतास, बक्सर, पटना सहित कतेको अन्य जिलासँ करीब 20 सँ 30 हजार लोक शामिल भेल।
मंच पर अबैत देरी चिराग पासवान माइक ल’ क’ कांग्रेस-राजद सरकारक असफलतासँ अपन भाषणक शुरुआत कयलनि। एकर संग-संग चिराग पासवान बिहार विधानसभा चुनावक संबंधमे सेहो एकटा पैघ घोषणा केलनि। केंद्रीय मंत्री कहलनि जे, बहुत लोक पूछि रहल छल जे चिराग विधानसभा चुनाव लड़ताह कि नहि ? एकर जवाब हम दैत छी, हम विधानसभा चुनाव लड़ब, मुदा बिहारसँ नहि बल्कि बिहारक जनताक लेल आ बिहारक लेल।
