लोक जनशक्ति पार्टी (रामविलास) बिहार विधानसभा चुनावमे अपन प्रदर्शन हर हालमे बेसी बेहतर करय केर कोशिशमे अछि। एहि सम्बन्धमे लोजपा (रामविलास) केर राष्ट्रीय अध्यक्ष आ केंद्रीय मंत्री चिराग पासवान पैघ जनसभा करय जा रहल छथि। एकर नाम नव-संकल्प महासभा राखल गेल अछि। ई सभा आठ जूनकेँ आरा केर बाबू वीर कुंवर सिंह स्टेडियममे होएत।
एहि कार्यक्रमक लेल राजनीतिक गलियारीमे पहिनहिसँ बहुत चर्चा भऽ रहल अछि। किछु गोटे कहैत छथि चिराग केन्द्रसँ बेसी राज्य पर एखनो ध्यान दऽ रहल छथि। किछु विपक्षी नेता कहि देलनि जे लोजपा (रामविलास) केर नेता चिराग पासवानकेँ मुख्यमंत्री पदक उम्मीदवारक रूपमे देखल जा रहल अछि।
चिराग पासवानक बहनोई आ सांसद अरुण भारती अपन बयानसँ पक्का कय देलनि आ स्पष्ट कहि देलनि जे विधानसभा चुनावमे चिराग आरक्षित सीटसँ नहि बल्कि सामान्य सीटसँ चुनाव लड़ि सकैत छथि।
अरुण भारती कहलनि जे हमर राष्ट्रीय अध्यक्ष चिराग पासवान सदिखन कहैत छथि जे हुनकर राजनीति बिहार केंद्रित अछि आ हुनकर विजन “बिहार फर्स्ट, बिहारी फर्स्ट” एकटा विकसित आ आत्मनिर्भर बिहारक संकल्प अछि। ई तखने संभव अछि जखनि ओ स्वयं बिहारमे रहि कय नेतृत्व करथि। चिराग पासवान आई मात्र प्रतिनिधि नहि, सम्पूर्ण बिहारक उम्मीद छथि। हुनक ई कदम सामाजिक न्याय केर राजनीतिकेँ एक नव दिशा देत। एहिमे प्रतिनिधित्व संग-संग सर्वमान्यताक लड़ाई सेहो लड़ल जायत।
लोजपा (सांसद) कहलनि जे जखनि हम प्रदेश प्रभारी केर रूपमे गाम-गाम गेलउँ, हर ठाम लोकक एक्के मांग रहल जे चिरागजीकेँ आब बिहारमे पैघ भूमिका निभेबाक चाही। हालहिमे पार्टी कार्यकारिणी केर बैसरमे सेहो सर्वसम्मतिसँ प्रस्ताव पास भेल जे ओ आगामी विधानसभा चुनावमे स्वयं चुनाव लड़ताह।
संगहि-संग, कार्यकर्त्ताक ईहो भावना अछि जे एहि बेर ओ कोनो आरक्षित सीटसँ नहि, बल्कि एकटा सामान्य सीटसँ चुनाव लड़ैथ, ताकि ई संदेश जाए जे ओ आब सिर्फ मात्र एकटा वर्गे नहि बल्कि पूरा बिहारक नेतृत्व करबाक लेल तैयार छथि।
