मुख्यमंत्री नीतीश कुमार बृहस्पति दिन सीतामढ़ीमे रीगा चीनी मिलक उद्घाटन कयलथि। मिल २०१९ सँ बंद पड़ल छल। आब मेडिकल कॉलेजक सौगात सेहो देबय जा रहल छथि।
बिहारक मुख्यमंत्री नीतीश कुमार आइ-काल्हि प्रगति यात्रा पर छथि। बृहस्पति दिन (२६ दिसंबर) मुख्यमंत्री सीतामढ़ीमे रीगा चीनी मिलक उद्घाटन कयलनि, जे पाँच सालसँ बन्द छल। १९३२मे बनल रीगा चीनी मिल २०१९ मे बन्द भऽ गेल छल। मुख्यमंत्री मनियारी गाममे कतेको विकास परियोजनाक लोकार्पण आ शिलान्यास सेहो कयलनि। बिहार विधानसभा चुनावसँ पहिने रीगा मिलक उद्घाटन जिलाक लेल एकटा पैघ उपहार मानल जा रहल अछि।
प्रगति यात्राक दौरान रीगा चीनी मिलक पुन: संचालन पर उपमुख्यमंत्री सम्राट चौधरी कहलनि जे ई एकटा ऐतिहासिक उपलब्धि अछि। एहिसँ ४०० कर्मचारीकेँ प्रत्यक्ष रोजगार आ लगभग २००० व्यक्तिकेँ अप्रत्यक्ष रोजगार भेटत। ओ कहलनि जे जँ चीनी मिल एक पेराई मौसमक लेल सफलतापूर्वक चालू भऽ जाइत अछि तँ सरकार गन्ना किसानक बकाया ५१.३० करोड़ टाकाक भुगतान सेहो करत।
चौधरी कहलनि जे चीनी मिलक फेरसँ संचालनसँ सीतामढ़ी, शिवहर, मुजफ्फरपुर, पूर्वी चंपारण आ मधुबनी जिलाक लगभग ५०,००० गन्ना उत्पादककेँ लाभ होएत आ हुनकर आर्थिक स्थितिमे सुधार होएत। ओ कहलनि जे २०२५ मे सीतामढ़ीमे एकटा मेडिकल कॉलेज शुरू कयल जायत, जाहिसँ सीमावर्ती मिथिला क्षेत्रक लाखो लोककेँ उच्च स्तरीय चिकित्सा सुविधा भेटत।
उप मुख्यमंत्री कहलनि जे पर्यटन विभाग सीतामढ़ी स्थित होटल जानकी बिहार परिसरमे २९,८७,१०,००० रुपया (उनतीस करोड़ सत्तासी लाख दस हजार) केर लागतसँ होटलक निर्माण करत। होटल २४ महीनामे पूरा भए जाएत। ओ कहलनि जे नव बजट होटलमे ५४ कमरा, ०४ सुइट रूम, स्विमिंग पूल, केंद्रीकृत वातानुकूलन आ कार पार्किंग होयत।
एकर अतिरिक्त, व्यवहार न्यायालय, सीतामढ़ीमे न्यायिक अधिकारीसभक लेल २८,६१,६५,०००/- रुपैया आवंटित कयल गेल अछि। जाहिसँ दूटा ब्लॉक २० जज क्वार्टर (जी+५) अर्थात कुल ४० यूनिट जज क्वार्टरक निर्माण २८ करोड़ ६१ लाख ६५ हजार रुपैयाक लागतसँ होयत।
