सेना प्रमुख वार्षिक प्रेस कॉन्फ्रेंसमे भारतक सीमा पर स्थितिक बारेमे जानकारी देलनि। ओ म्यांमारक बारेमे सेहो बात कयलनि।
सेना प्रमुख जनरल उपेन्द्र द्विवेदी कहलनि अछि जे देशक उत्तरी सीमापर स्थिति संवेदनशील मुदा स्थिर अछि। ओ आश्वासन देलनि अछि जे सेना कोनो विरोधीसँ निपटबाक लेल पूर्ण रूपसँ तैयार अछि आ सीमावर्ती क्षेत्रमे एकटा मजबूत बुनियादी ढाँचाक निर्माण भारतीय सेनाक लेल एकटा प्रमुख प्राथमिकता अछि।
सोमकेँ नई दिल्लीमे भारतीय सेनाक वार्षिक संवाददाता सम्मेलनमे जनरल द्विवेदी कहलनि जे जम्मू-कश्मीर क्षेत्रमे स्थिति नियंत्रणमे अछि आ ई आतंकवादसँ पर्यटन दिस बढ़ि रहल अछि। ओ कहलनि जे पछिला साल मारल गेल ६० प्रतिशत आतंकवादी पाकिस्तानी मूलक छल। ओ कहलनि जे केंद्र शासित प्रदेशमे एखन धरि स्थिति नियंत्रणमे अछि, मुदा सीमा पारसँ घुसपैठक प्रयास जारी अछि।
पूर्वी लद्दाखक वर्तमान स्थितिक विषयमे पूछला पर जनरल द्विवेदी कहलनि जे डेमचोक आ देपसांगमे विवादास्पद मुद्दाक समाधान कऽ लेल गेल अछि आ गश्त अभियान चलि रहल अछि। जनरल द्विवेदी कहलनि जे भारतीय सेना वास्तविक नियंत्रण रेखा (एलएसी) पर गहन नजरि राखि रहल अछि आ देशक सेना कोनो स्थितिसँ निपटबाक लेल पूर्ण रूपसँ तैयार अछि।
बांग्लादेशक स्थिति पर जनरल उपेन्द्र द्विवेदी जोर देलनि जे बांग्लादेश भारतक लेल रणनीतिक रूपसँ महत्वपूर्ण अछि। ओ कहलनि, “भारत आ बांग्लादेश पड़ोसी अछि आ दुनूक बीच कोनो शत्रुता एक दोसरक हितमे नहि अछि।
मणिपुरक वर्तमान स्थिति पर सेना प्रमुख कहलनि जे सुरक्षा बलक समन्वित प्रयास आ सक्रिय सरकारी पहल स्थितिकेँ नियंत्रणमे अनलक अछि। ओ कहलनि जे हिंसाक किछु घटना भऽ रहल अछि, मुदा सरकार क्षेत्रमे शान्ति बहाल करबाक लेल काज कऽ रहल अछि। सेना प्रमुख इहो कहलनि जे भारत-म्यांमार सीमापर शांति अनबाक लेल निगरानी आ बाड़ लगयबाक काज तेजीसँ आगू बढ़ि रहल अछि।
