११ जुलाई कऽ विश्व जनसंख्या दिवस होइत अछि। केंद्रीय मंत्री गिरिराज सिंह एक बेर फेर जनसंख्या नियंत्रणक बारेमे बड़का बयान देलनि। बढ़ैत जनसंख्यापर चिन्ता व्यक्त करैत ओ कहलनि जे देशमे १४७ जिला अछि जतय जनसंख्या तेजीसँ बढ़ि रहल अछि।
केन्द्रीय मंत्री गिरिराज सिंह लखीसराय पहुँचलाह आ एतय विद्यापीठ चौक पर भाजपा कार्यकर्ता लोकनि हुनकर जोरदार स्वागत कयलनि। एहि दौरान ओ पत्रकारक संग बातचीतक दौरान देशक जनसंख्याक चर्चा कयलनि। ओ कहलनि जे आइ विश्व जनसंख्या दिवस मनाओल जा रहल अछि। हम ई बात पहिने कहि चुकल छी आ आइ पुनः कहि रहल छी जे देशमे जनसंख्या नियंत्रण कानूनक सख्त आवश्यकता अछि।
गिरिराज सिंह कहलनि, “चीन दुनियामे विकासक झंडा फहराने अछि। एकर एकटा पैघ कारण ई अछि जे ओ एक बच्चाक नीति अनलक। यदि चीन वन चाइल्ड पाॅलीसी नहिं अनैत तँ एखनि एहि दुनियामे ६० करोड़ आर लोक होयतैक। भारत आइ दुनियाक सबसँ बेसी जनसंख्यावला देश बनि गेल अछि आ हमरासभक आबादी दुनियाक जनसंख्याक २० प्रतिशत अछि।”
केंद्रीय मंत्री कहलनि जे आइ देशमे जमीनक कमी अछि, लोकक लेल पेयजल कम भऽ रहल अछि। बढ़ैत जनसंख्या एकटा चुनौती अछि। तेँ जेना चीन जनसंख्यापर अंकुश लगाबय लेल कानून बनओलक, तहिना हमरासभकेँ सेहो एकर आवश्यकता अछि। हमरासभकेँ एहेन कठोर कानून बनयबाक चाही, जाहिसँ अवज्ञाकारी नागरिकक मतदानक अधिकारकेँ समाप्त कऽ देल जाय आ हुनका सरकारी सुविधासँ वंचित कऽ देल जाय।
ओ आगू कहलनि जे आइ देशमे १४७ जिला अछि जतय जनसंख्या तेजीसँ बढ़ि रहल अछि। एकर कारण ई अछि जे हिन्दू महिलासभक प्रजनन दर कम अछि आ मुस्लिम महिलासभक प्रजनन दर बेसी अछि। एहि लेल आइ देशमे जनसंख्या नियंत्रणक संबंधमे सख्त कानून अनबाक आवश्यकता अछि।
