सिमरीमे मुख्यमंत्री नीतीश कुमारक प्रगति यात्राक जोर-शोरसँ चलि रहल तैयारी प्रायः पूर्ण भऽ गेल अछि। तैयारीक जायजा लेबाक लेल जिलाक अधिकारी सबहक स्थल निरीक्षण करबाक दौरा जारी रहल । डीएम राजीव रौशन , एसएसपी जगुनाथ रेड्डी जला रेड्डी , प्रशिक्षु आईपीएस कोमल मीना , डीडीसी चित्रगुप्त कुमार , जिला पंचायत राज पदाधिकारी प्रशांत कुमार आदि सिमरी पंचायतमे योजना सबहक निरीक्षण कयलन्हि।
डीएम अपशिष्ट प्रबंधन इकाई केर भवन परिसरक निरीक्षणक दौरान अधिकारी सभकेँ निर्देश देलन्हि जे मुख्यमंत्रीक काफिला शास्त्री चौकसँ पंचायत सरकार भवन दिसि जायत । एहि केर देखैत सभसँ पहिने एहिये परिसरमें सीएम केर प्रवेश होयत। ओ कृषि आ मत्स्य विभागक अधिकारी सभकेँ ओतहि दुनु विभाग केर स्टाॅल लगाकय प्रस्तुति देबाक निर्देश देलन्हि। लगमे अवस्थित चंदसार पोखैरमे निर्माणाधीन घाटक निरीक्षण कऽ जिला परिषद सदस्य ओम प्रकाश ठाकुरसँ काजक पूर्ण हेबाक जानकारी लऽकय अनेको निर्देश देलन्हि।
चन्दसार पोखैर घाट पर सीएम माछक जीरा पोखैरमे देताह । ओहि लेल बनाओल गेल स्टैंडक अधिकारीगण सेहो जायजा लेलन्हि । मत्स्य विभागक दिसिसँ आनल गेल ड्रोन जाहिसँ माछ सभकेँ दाना देल जायत । तकर डेमो विभागक लोक डीएम आ अन्य अधिकारी सभकेँ देखौलनि। चन्दसार पोखरिसँ पंचायत सरकार भवन धरि जायवला सड़कक कात आई सी डी एस केर स्टाॅल लगेबाक निर्देश सीडीपीओ गीता कुमारीकेँ देल गेल।
डीएम पंचायत सरकार भवन केर सामने सड़कक दोसर दिसि अवस्थित चहारदीवारी केर रंग रोगन करबाक काज केर जल्दियेमे पूरा करबाक निर्देश देलन्हि । पंचायत सरकार भवन परिसरमे पैक्स भवन पर मूल्य आ भंडार प्रदर्शन पट्ट केर अपडेट करबाक निर्देश देलन्हि । उप स्वास्थ्य केंद्र , शेड आ पंचायत सरकार भवनक ऊपरका मंजिलक निरीक्षण करैत डीएम पुस्तकालयक सेहो निरीक्षण कयलन्हि । मध्य विद्यालय सिमरी आ कस्तुरबा गांधी आवासीय बालिका विद्यालयक नवनिर्मित भवनक उद्घघाटन केर तैयारीक डीएम अवलोकन कयलन्हि । स्टेडियममे भऽ रहल रंग रोगन आ सतह समतलीकरण काज केर तत्काल पूर्ण करबाक निर्देश संवेदककेँ देलन्हि । वासुदेव मिश्र प्लस टू उच्च विद्यालयमे जीविका लेल बनाओल जा रहल स्टाॅल , बास्केटबॉल , बैडमिंटन आ बॉलीबाल मैदानक जायजा लेलन्हि ।
भराठी स्थित वृहद आश्रय गृह केर लोकार्पण लेल कयल जा रहल साज सज्जा काज केर अवलोकन कय सीएम लेल बनाओल जा रहल दुनु हेलीपैड आ पहुंच पथ केर निरीक्षण कऽ हर हालमे तत्काल एहि सभ काजकेँ पूर्ण करबाक निर्देश देलनि । मौका पर मौजूद बीडीओ अमरेंद्र पंडित , बीपीआरओ मधुकांत प्रसाद , बीसीओ रवि कुमार आदि सेहो अधिकारी सबहक संग सिमरी पंचायतमे संचालित योजना सबहक निरीक्षण कयलन्हि।
