बिहारमे विधानसभा चुनावक लेल एखनि समय अछि। मुदा, मुख्यमंत्री नीतीश कुमारक नेतृत्वमे एनडीए पहिनेसँ तैयारी शुरू कऽ देने अछि। सोमकेँ पटनामे राजगक बैसार आयोजित कयल गेल।
बिहारमे वर्ष २०२५ मे
विधानसभा चुनाव होयबाक अछि। एहि चुनावक महत्वकेँ देखैत राजद नेता तेजस्वी यादव पहिनेसँ बैसार कऽ रहल छथि। दोसर दिसि आब मुख्यमंत्री नीतीश कुमार सेहो अपन कमर कसि कए चुनावक तैयारी शुरू कऽ देने छथि। सोमदिन मुख्यमंत्री नीतीश राजगक बैसार बजौलनि जाहिमे भाजपा, लोजपा (रामविलास) सहित विभिन्न दलक नेता भाग लेलनि। एहि बैसारमे २०२५क विधानसभा चुनावमे जीतक लक्ष्य निर्धारित कयल गेल अछि।
बिहारक मुख्यमंत्री नीतीश कुमारक नेतृत्वमे पटनामे भेल एनडीए नेताक बैसारमे चुनावमे जीतक लक्ष्य निर्धारित कयल गेल अछि। बैसारमे मुख्यमंत्री नीतीश कुमारक नेतृत्वमे आगामी विधानसभा चुनाव २०२५ मे २२५ सीट जीतबाक लक्ष्य राखल गेल अछि।
बैसारमे इहो निर्णय लेल गेल अछि जे राजगक सभ घटक दलक बीच बेहतर समन्वयक लेल जिला स्तर पर सेहो बैसार कयल जायत।
एक अने मार्ग स्थित मुख्यमंत्री निवास पर आयोजित बैसारमे मुख्यमंत्री नीतीश कुमार राजगक सभ घटक दलकेँ एकजुट रहबाक लेल कहलनि अछि। सीएम नीतीश २०१०क विधानसभा चुनाव जकाँ जीतकेँ दोहरयबाक बात कयने छथि। ओ सरकारक योजना सभकेँ जनता धरि पहुँचेबाक लेल कहलनि अछि।
बिहारमे विधानसभा चुनावक लेल एखनो समय अछि। आब जे बैसार बजाओल जा रहल अछि ताहि पर नेता लोकनि कहलनि जे एहि बैसारसँ कार्यकर्ता लोकनिक बीच सकारात्मक संदेश जायत आ ओ चुनावी लड़ाईक लेल अपनाकेँ तैयार करबामे सक्षम होयत। नेता लोकनि कहलनि जे एकरा लेल घटक दलक बीच समुचित समन्वय आवश्यक अछि आ एहि उद्देश्य लेल आजुक बैसार बजाओल गेल अछि।
