असमक मुख्यमंत्री हिमंत बिस्वा सरमा कहलनि जे तेजस्वी यादव आ राहुल गाँधी दुनू लग संविधानक एकटा प्रति अछि। एहिमे चीनी संविधान जकाँ लाल कवर अछि, जखन कि मूल भारतीय संविधानमे नीला कवर अछि। राजद नेता जे संविधान पढ़ैत छथि ओ संभवतः भारतक नहिं अछि।
लोकसभा चुनावमे संविधानकेँ लऽ कऽ भारतीय जनता पार्टी आ इंडिया गठबन्धनक नेताक बीच हंगामा भेल अछि। इंडिया गठबन्धनक नेता भाजपा पर संविधान बदलबाक आरोप लगा रहल छथि। राजद नेता तेजस्वी यादव एहि पर हमला करैत कहलनि जे प्रधानमंत्रीकेँ संविधानक बुनियादी ज्ञान नहिं अछि। असमक मुख्यमंत्री हिमंत बिस्वा सरमा हुनका पर कटाक्ष करैत शनिदिन कहलनि जे बिहारक पूर्व उपमुख्यमंत्रीक संविधान भारतक नहि भऽ सकैत अछि। संगहि पूछलनि “की यादव संविधानक विशेषज्ञ छथि ?”
सरमा आगू कहलनि “तेजस्वी यादव आ राहुल गांधी दुनू लग संविधानक प्रति अछि। एकर लाल आवरण चीनी संविधान जकाँ अछि, जखनि कि मूल भारतीय संविधानक कवर नील अछि। राजद नेता जे संविधान पढ़ैत छथि ओ संभवतः भारतक नहिं अछि।”
सरमा तेजस्वी यादव पर कटाक्ष करैत पूछलनि जे की ओ संविधानक विशेषज्ञ छथि। की हुनका डी.लिटक डिग्री अछि ? मोदी सभामे दावा कयने छलाह जे विपक्षी गठबन्धन निर्णय लेलक अछि जे जँ ओ सत्तामे अबैत छथि तँ पहिने संविधान बदलताह किएक तँ ओ तुष्टीकरणक नीति लागू करय चाहैत छथि।
ओतहि तेजस्वी यादव कहने छलाह जे भाजपा आरक्षण समाप्त करय चाहैत अछि। हुनकर पार्टी जाति गणनाक लेल पत्र लिखने छल मुदा ओ एकरा अस्वीकार कऽ देलनि। ओना बिहारमे जातिगत जनगणना कयल गेल आ ७५ प्रतिशत आरक्षण देल गेल।
सरमा दावा कयलनि जे पाँचम चरणक बाद एनडीए सरकार बनेबाक लेल पर्याप्त सीट जितने अछि। छठम आ सातम चरणमे एनडीए ४०० सँ बेसी सीटपर विजयक आंकड़ा पार करत। सरमा शनिदिन पटनामे भाजपाक वरिष्ठ नेता सुशील कुमार मोदीक निवास पर गेलाह आ हुनका श्रद्धांजलि देलनि। सुशील मोदीक निधन पछिला सप्ताह कैंसरसँ लड़ैत भऽ गेलनि।
ओ कहलनि जे हुनका सुशील मोदीक सङ्ग निकटतासँ काज करबाक सौभाग्य भेटलनि। ओ हुनका सभसँ बहुत किछु सीखने छलाह। ओ आपातकालक समय लोकतन्त्रक लेल लड़लाह आ सुशासनक लेल लड़लाह जखनि बिहारपर जंगलराजक बादल उमड़ि रहल छल।
