प्रधानमंत्री नरेन्द्र मोदी रविदिन झारखण्डक जमशेदपुर लोकसभा सीटक घाटशिलामे एकटा विशाल चुनावी जनसभाकेँ सम्बोधित करैत कांग्रेस, झामुमो आ राजद पर जोरदार हमला कयलनि।
प्रधानमंत्री कहलनि जे कांग्रेसक शहजादा नक्सलीक भाषा बाजि रहल छथि। ओ सभ लगातार उद्योग आ उद्योगपति पर हमला कऽ रहल छथि। नक्सलवादी कोनो उद्योगपतिकेँ बिना पाइ लेने कोनो काज नहिं करय दैत छल। हमसभ ओहि नक्सलवादीक कमर तोड़ि देलहुँ, मुदा आब कांग्रेस आ झामुमो ओहि नक्सलवादीक जिम्मेदारी लऽ लेने अछि। हुनकालोकनिकेँ सरोकार उद्योगक विकाससँ नहिं अपितु भ्रष्टाचार आ वसूलीसँ अछि।
प्रधानमंत्री सवाल उठौलनि जे जखनि कांग्रेसक शहजादा उद्योगपति आ निवेशकक विरोध करत, तखन तमिलनाडु, केरल, कर्नाटक, पश्चिम बंगाल, तेलंगाना, झारखंड सन राज्यमे जतय कांग्रेस आ ओकर सहयोगी दल सत्तामे अछि, कोन निवेशक जायत आ के उद्योग स्थापित करत ? कांग्रेस आ ओकर सहयोगी पार्टीक सरकार उद्योग आ उद्योगपतिक विरुद्ध वातावरण बना ओतय केर नौजवानक संग खेलवाड़ कय रहल अछि। ओ झारखण्डमे झामुमो-कांग्रेस-राजद सरकारपर राज्यकेँ लूटबाक आरोप लगबैत कहलनि जे ओकर नेता आ अधिकारीलोकनि लगसँ नोटक पहाड़ निकलि रहल अछि। आइ जहिना झारखण्डक नामक उल्लेख कयल जाइत अछि, दृश्य खनिज संपदासँ समृद्ध राज्यक नहिं अपितु लूटल नोटक पहाड़क दृश्य अबैत अछि। मोदी हुनकर ठिकानासँ लूटल गेल पाइ निकालि रहल छथि। ई धन गरीब, आदिवासी, दलित, पिछड़ा आ अहाँक बच्चाक अधिकारक लेल अछि। ओ कहलनि जे ई हुनकर गारंटी अछि जे जकरासँ ई पाइ लूटल गेल अछि ओकरा वापिस कऽ देल जायत। एकरा लेल सरकार कानूनी रास्ता खोजि रहल अछि।
राहुल गाँधी आ सोनिया गाँधीक नाम लेने बिना प्रधानमंत्री कहलनि जे ई लोक संसदक सीटक वसीयतनामा सेहो लिखि रहल छथि। शहजादा वायनाडसँ भागि रायबरेली पहुँचलाह आ कहि रहल छथि जे ई हमर मम्मीक सीट अछि। हुनकर माय कहि रहल छथि जे ओ अपन बेटाकेँ रायबरेलीकेँ सौंपि रहल छथि। की हुनका सभकेँ कोनो एहन कार्यकर्ता सेवा करयवाला रायबरेलीक लेल ५०-६० सालमे नहिं भेटल ?
कांग्रेसकेँ भ्रष्टाचारक जननी बताबैत प्रधानमंत्री कहलनि जे ओ अनगिनत घोटालामे रिकॉर्ड बनौलनि, हुनकर सहयोगी राजद गरीबसँ नौकरीक बदलामे जमीन लिखबा लेलक आ झामुमो इएह चरित्र हुनकालोकनिसँ सीखलक। झामुमो झारखण्डमे भूमि घोटाला कयलक, गरीब आदिवासीसभक जमीन हड़पि लेलक आ सेनाक जमीन हड़पबाक प्रयास कयलक। हम जमशेदपुरक धालभूमगढ़मे हवाई अड्डा बनबय चाहैत छी, मुदा झामुमो आ कांग्रेस एकरा बाधित करबाक प्रयास कऽ रहल अछि।
प्रधानमंत्री कहलनि जे चुनावमे देशक अर्थव्यवस्था, उद्योग आ लघु उद्योगक विकास, राष्ट्रीय सुरक्षा, कृषि आ वनोपज आ युवाक भविष्य पर चर्चा होयबाक चाही, मुदा कांग्रेस-झामुमो एहि बातक परवाह नहिं करैत अछि। हुनका लोकनिकेँ विकासक “क, ख, ग, घ” सेहो नहिं ज्ञात अछि।
ओ कहलनि जे “हम गरीबक दर्द जनैत छी” आ हुनका लेल १० साल धरि लगातार काज कयलहुँ अछि। हम २५ करोड़ लोककेँ गरीबीसँ बाहर निकाललहुं, ५२ करोड़ लोकक जनधन खाता खोललहुं आ चारि करोड़ लोककेँ पक्का घर उपलब्ध करा देलहुं। हर घरमे नलक माध्यम सँ पानि पहुँचाओल गेल अछि।
मोदी कहलनि “संविधानक खतरा इंडी गठबंधनसँ अछि। बाबासाहेब अंबेडकर धर्मक आधार पर आरक्षणक विरुद्ध छलाह, मुदा ई लोकसभ दलित, आदिवासी आ पिछड़ासँ आरक्षण छीनि कऽ मुसलमानकेँ देबय केर बात करैत छथि। किछु राज्यमे ई शुरू सेहो भऽ गेल अछि। हम कांग्रेससँ कहलहुं जे ओ लिखितमे गारंटी देथि जे ओ धर्मक नाम पर आरक्षण नहिं देताह, मुदा ओ एखन धरि एहि पर चुप छथि।”
प्रधानमंत्री जमशेदपुरसँ भाजपा उम्मीदवार विद्युत बरण महतोकेँ विजयी बनाबय लेल अपील करैत कहलनि कि अहाँक हर वोट मोदीकेँ जाएत।
झारखण्ड भाजपा अध्यक्ष बाबूलाल मरांडी सेहो जनसभाकेँ सम्बोधित कयलनि। एहि अवसर पर केन्द्रीय मंत्री अर्जुन मुंडा आ झारखंड विधानसभामे विपक्षक नेता अमर कुमार बाउरी सेहो उपस्थित छलाह।
