प्रधानमंत्री नरेन्द्र मोदी घोषणा कयलनि अछि जे देशक दूटा पूर्व प्रधानमन्त्री चौधरी चरण सिंह आ नरसिम्हा रावकेँ भारत रत्नसँ सम्मानित कयल जायत। संगहि प्रधानमंत्री घोषणा कयलनि जे डॉ. एमएस स्वामीनाथनकेँ कृषि क्षेत्रमे उत्कृष्ट योगदानक लेल भारत रत्न देल जायत।
प्रधानमंत्री अपन एक्स एकाउंट पर लिखलनि “ई हमर सरकारक सौभाग्य अछि जे पूर्व प्रधानमंत्री चौधरी चरण सिंह जीकेँ भारत रत्नसँ सम्मानित कयल जा रहल अछि। ई सम्मान देशक लेल हुनक अतुलनीय योगदानकेँ समर्पित अछि। ओ अपन पूरा जीवन किसानक अधिकार आ कल्याणक लेल समर्पित कऽ देलनि। उत्तर प्रदेशक मुख्यमंत्रीक रूपमे होइ वा देशक गृहमन्त्रीक रूपमे आ विधायकक रूपमे सेहो ओ सदैव राष्ट्र निर्माणकेँ गति देलनि। ओ आपातकालक विरुद्ध सेहो अडिग रहलाह। हमर किसान भाइ-बहिनक प्रति हुनकर समर्पण आ आपातकालक दौरान लोकतन्त्रक प्रति हुनकर प्रतिबद्धता पूरा देशकेँ प्रेरित करैत अछि।”
पूर्व प्रधानमंत्री नरसिम्हा रावकेँ भारत रत्न देबाक घोषणा करैत पीएम मोदी लिखलनि, “ई कहि प्रसन्नता भऽ रहल अछि जे हमर पूर्व प्रधानमंत्री श्री पीवी नरसिम्हा राव गरूकेँ भारत रत्नसँ सम्मानित कयल जायत। एकटा विशिष्ट विद्वान आ राजनेताक रूपमे नरसिम्हा राव गरु विभिन्न क्षमतामे भारतक सेवा कयलनि। आन्ध्र प्रदेशक मुख्यमंत्री, केन्द्रीय मंत्री आ कतेको वर्ष धरि संसद आ विधान सभाक सदस्यक रूपमे हुनक सेवाक लेल हुनका समान रूपसँ स्मरण कयल जाइत अछि। हुनक दूरदर्शी नेतृत्व भारतकेँ आर्थिक रूपसँ उत्थान करबामे, देशक समृद्धि आ विकासक ठोस नींव रखबामे महत्वपूर्ण भूमिका निभेलक। प्रधानमंत्रीक रूपमे नरसिम्हा राव भारतकेँ वैश्विक बजारक लेल खोलि देलनि, जाहिसँ आर्थिक विकासक एकटा नव युगकेँ बढ़ावा भेटल। एकर अतिरिक्त, भारतक विदेश नीति, भाषा आ शिक्षा क्षेत्रमे हुनक योगदान एकटा एहन नेताक रूपमे हुनक बहुआयामी विरासतकेँ रेखांकित करैत अछि जे भारतकेँ नहिं मात्र महत्वपूर्ण परिवर्तनक माध्यमसँ आगू कयलनि अपितु ओकर सांस्कृतिक आ बौद्धिक विरासतकेँ सेहो समृद्ध कयलनि।”
स्वामीनाथनकेँ ‘भारत रत्न’ देबाक घोषणा करैत पीएम मोदी लिखलनि “ई बहुत प्रसन्नताक विषय अछि जे भारत सरकार डॉ. एम.एस. स्वामीनाथन जीकेँ हमर देशमे कृषि आ किसान कल्याणमे उल्लेखनीय योगदानक लेल भारत रत्न प्रदान कऽ रहल अछि। ओ चुनौतीपूर्ण समयमे भारतकेँ कृषिमे आत्मनिर्भरता प्राप्त करबामे सहायता करबामे महत्वपूर्ण भूमिका निभौलनि आ भारतीय कृषिक आधुनिकीकरणक दिशामे उत्कृष्ट प्रयास कयलनि। हम एकटा अन्वेषक आ संरक्षकक रूपमे हुनक अमूल्य काजकेँ सेहो मान्यता दैत छी आ बहुत रास छात्रक बीच सीखब आ शोधकेँ प्रोत्साहित करयवाला हुनक अमूल्य काज केर जनैत छी। डॉ. स्वामीनाथनक दूरदर्शी नेतृत्व नहिं केवल भारतीय कृषिकेँ बदलि देलक अछि बल्कि देशक खाद्य सुरक्षा आ समृद्धि सेहो सुनिश्चित कयलक अछि। ओ एहन व्यक्ति छलाह जकरा हम लगसँ जानैत छलहुँ आ हम हरदम हुनक अंतर्दृष्टि आ इनपुटकेँ महत्व दैत छलहुँ।”
